Qyzylordada qurǵaq túıe sútin óndirý qolǵa alynbaq

QYZYLORDA. QazAqparat - Qyzylorda oblysy Aral aýdanynda qurǵaq túıe sútin óndirý isi júzege asatyn bolady. Búgingi tańda aýdanda túıe sútin qabyldaý pýnktterin qurý jumystary qolǵa alyndy, dep habarlaıdy QazAqparat tilshisi.

Mundaı oryn aýdanǵa qarasty Aralqum eldi mekeninde ashyldy. Bastamashy - jergilikti turǵyn Bolat Jańabaev. Jergilikti kásipker ótken jyly osy isti qolǵa alýǵa bel býyp, sút qabyldaý pýnktin ashý baǵytynda Almaty qalasyndaǵy «Nar» JShS-men kelissóz júrgizgen. Nátıjesinde atalǵan JShS-niń ókili Ǵalym Kapý Aralqum aýylyna arnaıy qurylǵylardy jetkizip, shıki túıe sútin qabyldaýdy bastap ketti. Atap ótý qajet, jergilikti jerden jınalǵan sút arnaıy salqyndatqysh qondyrǵysy bar avtokólikpen qurǵaq sút óndirý zaýytyna jóneltiledi. Óndirilgen ónim alys-jaqyn shet elderge eksporttalady.

Qazirgi tańda qabyldaý ornynda 3 sút quıatyn tsısterna, 10 sút saýǵysh arnaıy apparat, 3 elektr qýatyn beretin jáne sút quramyn tekseretin apparat pen qosymsha ydystar ornalastyrylǵan. Túıe sútin qabyldaý pýnkti tolyǵymen kúshine ense, bes adam turaqty jumyspen qamtylady.