Qyzylordada koronavırýs juqtyrǵandardyń basym kópshiligi - vaktsına almaǵandar

QYZYLORDA. QazAqparat - Qyzylorda oblysynda ótken táýlikte 168 adam koronavırýs juqtyrdy. Bul - pandemııa bastalǵannan bergi eń joǵary kórsetkish, dep habarlaıdy QazAqparat tilshisi.

Óńirde pandemııa bastalǵaly koronavırýs ınfektsııasynyń 9369 jaǵdaıy tirkeldi. Máselen, sońǵy táýlikte 168 derek anyqtaldy.

Іndet juqtyrǵandardyń basym kópshiligi oblys ortalyǵynan tirkelýde. Onyń ishinde, 14 jasqa tolmaǵan balalardyń úlesi - 19.

- Kúndelikti júrgiziletin epıdemıologııalyq taldaý nátıjesi kórsetkendeı, COVID-19 juqtyrǵandardyń basym kópshiligi - vaktsına saldyrmaǵan adamdar. Qazir álemde, respýblıkada, aımaqta epıdahýal órship tur. Aýrýhanalarda júkteme artty, indet juqtyrǵandardyń basym kópshiligi aýyr halde jatyr. Byltyr aýrýdyń sımptomsyz túri kóp tirkelgen bolsa, bıyl aýrýdyń mýtatsııalanýynan aýyr aǵymda ótýde. Bul jaǵdaıdy turaqtandyrýdyń joly – saqtyq sharalary men vaktsınatsııa. Vaktsına alý, onyń qoljetimdiligin qamtamasyz etý úshin barlyq jaǵdaı jasalǵan. Onlaın ekpege jazylyp, óz emhanańyzda nemese iri saýda oryndarynda eshbir kezeksiz vaktsınalanýǵa bolady. Aýrýdy eńserýge birge kúsh salýǵa shaqyramyz,-dedi oblystyq sanıtarııalyq-epıdemıologııalyq baqylaý departamentiniń basshysy Dınara Jańabergenova.

1 aqpan men 26 shilde aralyǵynda oblysta vaktsınanyń 1 komponentimen 220 060, 2 komponentimen – 140 309 adam ekpe saldyrǵan.

Monıtorıng tobynyń músheleri 11 820 nysanǵa reıd júrgizdi. Nátıjesinde karantın talaptaryn buzǵan 396 derek anyqtalyp, olarǵa ákimshilik aıyppul salyndy.

Eske salsaq, Qyzylordada «Ashyq» arqyly jumys isteıtin nysandarǵa kirmek bolǵan 12 adamǵa aıyppul salyndy.