Qyzylordada kópbalaly otbasylar úshin baspana qurylysy bastaldy
Syr óńirinde az qamtylǵan jáne kópbalaly 150 otbasy oblystyq bıýdjet qarajaty men «Bolat Ótemuratov qorynyń» qaıyrymdylyq kómegi arqasynda turǵyn úımen qamtamasyz etiletin bolady. Baspanalar bıýdjetten - 50 jáne qor esebinen 100 otbasyǵa salynady.
Baspananyń 1 sharshy metriniń quny 70 myń teńgeni quraıdy. Turǵyn úı qurylysy 1 qyrkúıekke deıin aıaqtalady dep josparlanǵan. «Bolat Ótemuratov qory» turǵyn úılerdi salý boıynsha «Balameken» jobasynyń júzege asyrylýyna 450 mln teńge bóldi. Al jergilikti basshylyq bul ýaqytqa deıin barlyq ınjenerlik ınfraqurylymdar - elektr, gaz, sý, telefon baılanysy men avtojoldar qurylysyn aıaqtaýǵa, sondaı-aq árbir úıge 6 sotyq jer telimin bólýge kepildik berip otyr.
Aıta keteıik, kópbalaly otbasylarǵa turǵyn úıler salý jónindegi memorandýmǵa 27 naýryzda QR Premer-Mınıstri Asqar Mamınniń tóraǵalyǵymen ótken keńeste qol qoıyldy.
Onda QR Tuńǵysh Prezıdenti-Elbasy Nursultan Nazarbaevtyń kópbalaly jáne az qamtylǵan otbasylar, múmkindigi shekteýli bala tárbıelep otyrǵan otbasylar úshin turǵyn úıdiń qoljetimdiligin arttyrý tapsyrmasyn oryndaý máseleleri talqylanǵan edi. Keńes barysynda atalmysh máseleni sheshýdegi Qyzylorda oblysynyń tájirıbesi erekshe atap ótilip, ózge óńirlerge úlgi retinde aıtyldy.