Qyzylordada kóp adam jınalǵan toı ótkizý tyıylar emes
Óńirde budan buryn karantın talaptary kezeń-kezeńimen jeńildetilgen edi. Dese de áli de birqatar shekteý bar. Qyzylorda oblysynyń Bas memlekettik sanıtarııalyq dárigeriniń 2021 jylǵy 11 naýryzdaǵy №4 qaýlysy negizinde oıyn-saýyq is-sharalaryn, sondaı-aq otbasylyq, saltanatty, estelik is-sharalardy (banketter, úılený toılary, mereıtoılar) uıymdastyrýǵa múldem bolmaıdy. Onyń ishinde úıde jáne adamdar kóp jınalatyn ózge de is-sharalardy ótkizýge, merekelik korporatıvterdi uıymdastyrý men ótkizýge tyıym salynǵan.
«Osyndaı shekteýlerge qaramastan turǵyndar arasynda áli de toıǵa shaqyrý, toıǵa barý, kóp adam jınalǵan is-sharalar ótkizý jalǵasýda. Atap aıtqanda, jyl basynan beri úı jaǵdaıynda uıymdastyrylǵan otbasylyq 28 ártúrli ulttyq dástúrlik sharalar anyqtalǵan. Olardyń qatarynda qyz uzatý, úılený, tusaý kesý, quda kútý, betashar, týǵan kún sekildi sharalar bar. Sondaı-aq, bankettik zaldarǵa tek shekteýli adamdar sanymen as berýge ruqsat etilgenine qaramastan meıramhanalarǵa 100-den asa qonaqtar jınap toı ótkizý derekteri belgili boldy. Bul kásipkerlik nysandaryna ákimshilik aıyppuldar salyndy», - dep málim etti oblystyq sanıtarııalyq-epıdemıologııalyq baqylaý departamentinen.
Taldaý júrgizý barysynda halyq tarapynan ulttyq dástúrdegi toı-jıyndardy tek demalys kúnderi emes, sonymen qatar jumys kúnderi de jıi uıymdastyrylatyny anyqtaldy. Sondyqtan jumysshy top jumys kúnderi de jeke turǵyn úıler men meıramhanalarǵa, jalǵa beriletin kottedjderge júrgiziletin reıdtik sharalardy kúsheıtip otyr. Sebebi, byltyr naýryz aıynda oblysta epıdemıologııalyq ahýal órship, ınfektsııa juqtyrýdyń toptasqan jaǵdaılary osyndaı jıyn-toılardyń sebebinen oryn alǵan bolatyn.
Sondaı-aq, budan buryn Qyzylordada karantın talabyn saqtamaǵan aýyl ákimine aıyppul salyndy.