Qyzylordada kóne ádebı muralar kóshirmesi qoıylǵan kórme ótti
Atalmysh is-shara «Arhıv-2025» baǵdarlamasy aıasynda qolǵa alynyp otyr. Qyzylorda oblystyq «Rýhanı jańǵyrý» ortalyǵynyń uıymdastyrýymen ótkizilgen kórme Á.Tájibaev atyndaǵy oblystyq ámbebap ǵylymı kitaphanasynda uıymdastyryldy.
Kórmege shetel arhıvteri men kitaphanalarynan ákelingen ultymyzdyń ádebı qundy muralary qoıylǵan. Onyń ishinde Júsip Balasaǵunnyń «Qutadǵý bilik», Mahmýt Qashqarıdyń «Dıýanı Luǵat at túrk», Ahmed Iúginekıdiń «Hıbatýl haqaıyq», Ál-Ferǵanıdiń «Astronomııa», Ábý Raıhan Ál-Bırýnıdiń «Medıtsına» týraly eńbekteri jáne «Qorqyt Ata kitabynyń» Drezden men Vatıkan nusqalarynyń kóshirmeleri bar.
Uly dalada babalarymyz jazǵan bul kitaptardyń álemdik órkenıet pen ǵylymǵa qosqan úlesi orasan. Atap aıtqanda, Ál-Ferǵanıdiń (798-861 j.) astronomııa ilimi týraly eńbegi Eýropa ǵylymynyń damýyna áser etken. Al, Júsip Balasaǵunnyń «Qutadǵý bilik» kitabynda ulttyq bolmysymyz, salt-dástúrimiz, memlekettik júıemiz kórsetilgen.
«Júsip Balasaǵun aýyzsha taraǵan derektiń ýaqyt ótken saıyn ózgerip túrlenetinin, al jazylǵan málimettiń qansha ǵasyr ótse de mazmuny joǵalmaıdy. Biz kórmege qoıyp otyrǵan kitaptar - kóne dáýirden jetken tarıhı qundy jádigerler, álemdik órkenıet pen ǵylymǵa zor úles qosqan eńbekter. Bul qundy dúnıeler Uly Dalada ómir súrgen bizdiń babalardyń qolynan shyqqan. Búginde atalmysh kitaptar shetelderdiń arhıvteri men kitaphanalarynda saqtaýly tur. Kóshirmelerin ákelip, halyqtyń nazaryna usynyp otyrmyz. Maqsatymyz - babadan qalǵan qundy muralar arqyly tarıhı tamyrymyz tereńde ekenin kórsetip, jas urpaqtyń sanasyn oıatý, rýhanı turǵyda jańǵyrtý», - dedi Qyzylorda oblystyq «Rýhanı jańǵyrý» ortalyǵynyń «Atameken» bóliminiń basshysy, PhD doktor Bekarys Nurıman.