Qyzylordada qazaq tilinde mýltfılmder qurastyratyn boıjetken turady
Sharada aldymen oblys ákiminiń orynbasary Rýslan Rústemov «Qazaqstannyń 100 jańa esimi» jobasyna engen jerlesterimizdi quttyqtap, jyly lebizin bildirdi.
«Táýelsizdik alǵannan keıin elimizdiń kórkeıýine úles qosqan, jerlesterimizdi kópshilikke tanytý maqsatynda jalpyhalyqtyq «100 jańa esim» jobasy qolǵa alynǵan bolatyn. Jaqynda jobanyń jeńimpazdary Elbasymen júzdesip qaıtty. Onyń ishinde Symbat Nurtazaqyzy da bar. Symbattyń jetken jetistigi men jasaǵan eńbegi kóptegen jastarǵa úlgi bolary anyq», -dedi Rýslan Rústemov.
Symbat Ábdirahmanova 1988 jyly 10 jeltoqsanda Qyzylorda qalasynda dúnıege kelgen. Abylaı han atyndaǵy Qazaq Halyqaralyq qatynastar men Álem tilderi ýnıversıtetinde «fılologııa» mamandyǵyn, 2007 jyly Iran memleketiniń «Tabotaboı» ýnıversıtetinde arnaıy biliktilik arttyrý kýrsynda bilim aldy. Iran Islam Respýblıkasynyń Qazaqstandaǵy elshiliginde aýdarmashy qyzmetin atqardy. «Іlespe aýdarmashy» mamandyǵy boıynsha magıstratýrada bilimin jetildirdi. Qazirgi tańda oblystyq bilim basqarmasy janyndaǵy oblystyq oqý ortalyǵynda «Áleýmettik pedagogıkalyq qyzmet» bóliminiń meńgerýshisi qyzmetin atqarýda.
Bilikti maman balalarǵa arnalǵan qazaq tilindegi damytýshy mýltfılmder qurastyrǵan jas maman. Aýdarmashy, psıholog. Ol parsy tili boıynsha Orta Azııalyq Olımpıadanyń 1-oryn ıegeri. «Pedagogıkalyq izdenis» ǵylymı-ádistemelik jýrnalynyń redaktsııa alqasynyń múshesi. Sonymen birge Symbat tilinde múkistigi bar balalarǵa arnalǵan birneshe mýltfılmderdiń avtory. Atap aıtar bolsaq, «Dybystardy mashyqtandyrý», «Kóńildi túster» eńbegi bar.