Qyzylordada kásipkerlikti damytýǵa arnalǵan kórme uıymdastyryldy

QYZYLORDA.QazAqparat - Qyzylorda qalasynda Naýryz merekesine oraı Ortalyq alańda 30 kıiz úı tigilip, ár kıiz úıge ózindik zamanǵa saı ataý berildi: «Shyǵys juldyzy», «Rýhanı jańǵyrý», «Astana qalasyna 20 jyl, Qyzylorda qalasyna 200 jyl», dep habarlaıdy  QazAqparat tilshisi.

Munda kelgen qonaqtar tátti taǵamdardan dám tatyp, qyzyqty oıyn-saýyq baǵdarlamalaryn tamashalady. Odan bólek, arnaıy pavılondarda Jappaı kásipkerlikti damytý jylyna arnalǵan kórme uıymdastyrylyp, jergilikti óndirýshilerdiń ónimderi ornalastyrdy.

Merekelik is-shara barysynda qazaqsha kúres, asyq atý, arqan tartý, gir kóterý sekildi ulttyq sport oıyndarynan jarys uıymdastyryldy, taqyryptyq sahnalyq kórinister men kontsert kórsetildi.

Oblys ákimi Qyrymbek Kósherbaev aımaq turǵyndaryn  quttyqtap, jyly lebizin bildirdi.

«Bıyl biz Astananyń 20 jyldyǵy men Qyzylorda qalasynyń 200 jyldyq mereıtoıyn toılamaqpyz! Naýryz ben naýryz aralyǵynda Syr óńiri de jelkendi jetistikter men taǵylymdy tabystar ordasyna aınaldy. 2018 jyl oblysymyzda Jappaı kásipkerlikti damytý jyly dep jarııalandy. Sulý Syrdyń sol jaǵalaýynan jańa qala boı kóterýde.  Elordamyz Astanany gazdandyrý - bizdiń Syr óńirinen bastaý alatyny biz úshin úlken qýanysh. Osyndaı jaqsylyǵy mol izgi istermen Naýryz meıramyna aman-esen jetip otyraıyq», - dedi aımaq basshysy.

Sondaı-aq, oblys ákimi Tıtov móltekaýdanyndaǵy burynǵy apatty úı turǵyndary qonystanǵan Tasbóget kentindegi móltek aýdanǵa baryp, jaǵdaılarymen tanysyp,  Ulystyń uly kúnimen quttyqtady. Mereke qarsańynda jańa úıge qonystanǵan turǵyndar aımaq basshysyna máselelerin tez arada sheship bergeni úshin taǵy da alǵys aıtty.

 Qyzylorda qalasy men barlyq aýdandarda senbilikter, aýyl sharýashylyq ónimderi jármeńkeleri, túrli merekelik sharalar uıymdastyryldy. Máselen, keshe ortalyq alańda «Dombyra-dýman» jáne «Jastar keshi» ótti. 20-31 naýryz kúnderi kórkemsýret galereıasynda «Kóktem lebi» kórmesinde jas sýretshiler kórermenderdiń nazaryna óz ónerlerin usynady. Qalalyq ıppodromda báıge, aýdaryspaq, teńge ilý, qyz qýý sekildi ulttyq oıyn túrlerinen jarystar ótti.

Taǵy bir erekshelik - bıyl árbir merekelik kún belgili taqyryppen ótkizildi. Máselen, 16 naýryz  - «Naýryz dástúr»,  17 naýryz - «Naýryz-jańarý» kúni bolyp bekitilip, saltanatty sharalar, tanymdyq sabaqtar men kezdesýler uıymdastyryldy.