Qyzylordada karantın talabyn saqtamaǵan aýyl ákimine aıyppul salyndy
Búginde óńirde bul baǵytta 45 monıtorıngtik top jumys isteýde. Onyń quramynda polıtsııa departamenti, jergilikti atqarýshy organdar, qoǵam belsendileri men eriktiler bar.
Barlyǵy 128 maman karantın talaby saqtalýyn qadaǵalaýǵa jumyldyrylǵan.
«Qazirgi tańda karantın talaptary eńbek ujymdarynyń barlyǵynda birdeı saqtala bermeıdi. Naýryz aıynda ótken merekeler barysynda karantın talaptaryn saqtamaǵan birqatar uıymdar men memlekettik qyzmetshilerge ákimshilik quqyq buzýshylyq kodeksine sáıkes aıyppul salyndy», - deıdi oblystyq sanıtarııalyq-epıdemıologııalyq baqylaý departamentiniń basshysy Dınara Jańabergenova.
Vedomstvo málimetinshe, osyndaı salǵyrttyqqa oblystaǵy aýyl ákiminiń biri jol bergen.
Ol ujymdyq is-shara kezinde betperde kımeı, halyqtyń sanıtarııalyq-epıdemıologııalyq salamattylyǵy zańnamasy talaptaryn buzǵan.
Endigi kezekte ol 230 AEK ákimshilik aıyppul tóleıdi.
Óńirde oqý jylynyń tórtinshi toqsan bastalǵaly beri bilim mekemelerinde 29 karantın talabyn buzý deregi anyqtalǵan.
Oǵan qosa, halyqqa betperdesiz qyzmet kórsetkeni úshin medıtsınalyq jáne memlekettik uıym qyzmetkerlerine de aıyppul salynǵan.
«Arnaıy monıtorıng toptary karantın talaptarynyń saqtalýyn qadaǵalaý úshin kún saıyn tekserý júrgizýde. Máselen oblys ortalyǵynyń ózinde 1500-den astam nysan men turǵyn úı aralandy. Onyń ishinde, karantın talaptaryn saqtamaı toı jáne basqa da ruqsat etilmegen merekelik sharalar jasaǵan 83 jaǵdaı anyqtaldy. Al 52 nysanǵa quzyrly organ arqyly ákimshilik shara qoldanyldy», - dedi arnaıy monıtorıng tobynyń jetekshisi Lázzat Baqtybaeva.
Aıta keteıik, Qyzylordada jyl basynan beri karantın talaby 137 márte buzylǵan.