Qyzylordada etnos ókilderi til saıysyna qatysty

QYZYLORDA. QazAqparat - Qyzylordada ózge ult ókilderi arasynda «Memlekettik til - ult tiregi» taqyrybymen qalalyq baıqaý ótti. Bul týraly oblystyq «Rýhanı jańǵyrý» ortalyǵy «Aqparat tolqyny» bóliminiń mamany Janar Ergenbaıqyzy málim etti, dep habarlaıdy QazAqparat.

«Til - halyqtyń máńgilik bolyp qalýynyń aıǵaǵy. Til - ata-babanyń urpaqqa qaldyrǵan amanaty, búgingi kúnniń abyroıy, erteńgi kúnniń kepili. Elbasy «Rýhanı jańǵyrý» baǵdarlamasynda qoǵamdyq sanany jańǵyrtýdyń negizgi baǵyttarynyń biri retinde ulttyq biregeılikti saqtaý dep aıshyqtap kórsetti. «Ulttyq salt-dástúrlerimiz, tilimiz ben mýzykamyz, ádebıetimiz, joralǵylarymyz, bir sózben aıtqanda ulttyq rýhymyz boıymyzda máńgi qalýǵa tıis», degen bolatyn N.Á.Nazarbaev. Demek, «el bolamyn deseń - besigińdi túze» deıtin qazaq, til, din, salt-dástúr, ádebıet pen mýzyka, taǵysyn-taǵy balanyń boıyna besikten bastap sińirýi tıis. Bala kezden sapaly tárbıe alǵan bala, sanaly urpaq bolyp óseri anyq», - deıdi ol.

J.Ergebaıqyzynyń aıtýynsha, tildi damytý aıasynda óńirde atqarylyp jatqan sharalar az emes. Sonyń biri «Memlekettik til - ult tiregi» taqyrybymen ózge ult ókilderi arasynda ótti. Qalalyq baıqaýǵa mektep oqýshylarynan quralǵan komandalar qatysty. Maqsaty - memlekettik til saıasatyn nasıhattaý, etnosaralyq qarym-qatynasty jahandandyrý, memlekettik tilge degen qurmetti arttyrý.

Baıqaýǵa №5 mektep-lıtseıiniń, №9 mektep-gımnazııasynyń, №23, 112, 173, 176, 198 jáne №233 orta mektepteriniń komandalary qatysty. Olar «Tanystyrý», «Oı jarys», «Salt-dástúr - ult qazynasy», «Ónerliniń órisi keń» atty tórt kezeń boıynsha baq synady.

Sharaǵa Qorqyt ata atyndaǵy QMÝ-diń «Qazaq tili men ádebıeti jáne jýrnalıstıka» kafedrasynyń qaýymdastyrylǵan professory, fılologııa ǵylymdarynyń kandıdaty A.Abasılov, qalalyq mádenıet jáne tilderdi damytý bóliminiń bas mamany A.Alıeva jáne M.Eralıeva atyndaǵy mádenıet úıiniń dırektory L.Nasımhanova tórelik etti.

Ár mektepten jıylǵan túrli ult ókilderi qazaqsha án aıtyp, uly aqyndardyń shyǵarmalarynan úzindi oqydy, qazaqtyń salt-dástúrlerin sahnalap, maqal-mátel aıtýdan saıysty. Nátıjesinde bas júldeni №112 orta mektepten kelgen «Birlik» komandasy qanjyǵasyna baılasa, I orynǵa №198 mekteptiń «Dostyq» komandasy ıe boldy. Al №233, №9 mektepter II oryndy, №5, №23 jáne №173 mektepten kelgen toptar III oryndy ózara bólisti.

Qazylar alqasynyń tóraǵasy A.Abasılov: «Tilge qurmet kórsetýdiń túrli joly bar. Elbasy «Rýhanı jańǵyrý: bolashaqqa baǵdar» maqalasynda «...ótken HH ǵasyr halqymyz úshin qasiretke to­ly, zobalań da zulmat ǵasyr boldy. Birinshiden, ulttyq damýdyń kóneden jalǵasyp kele jatqan ózimizge ǵana tán joly birjola kúıretilip, qoǵamdyq qurylymnyń bizge jat úlgisi eriksiz tańyldy. Ekinshiden, ultymyzǵa adam aıtqysyz demo­grafııalyq soqqy jasaldy. Onyń jarasy bir ǵasyrdan beri áli jazylmaı keledi. Úshinshiden, qazaqtyń tili men mádenıeti qur­dymǵa kete jazdady» dep ulttyq kodymyzǵa jasalǵan qııanattardy atap kórsetedi. Al, osyndaı sharalar tildiń, salt-dástúr men mádenıetimizdiń qaıta jańǵyrýyna, evolıýtsııalyq damýǵa ákeletini sózsiz. Jáne ózge ult ókilderiniń arasynda ótkizilýinde de úlken mán bar ekenin eskerýimiz kerek» - dedi.

Osylaısha «Júzi basqa, júregi bir, tili basqa, tilegi bir» jas jetkinshekter qazaq ultyna, onyń tiline qurmetterin kórsetti.