Qyzylordada etnoaýyl jyl boıy úzdiksiz jumys isteıdi

QYZYLORDA. QazAqparat - Qyzylorda qalasynda ulttyq ónerdi dáriptep júrgen dızaıner Aıda Kerimqulova byltyrdan bastap etnoaýyl uıymdastyryp, halyq nazaryna usynyp keledi, dep habarlaıdy QazAqparat tilshisi.

Etnoaýyl qala ortalyǵynda darııa arnasyna jaqyn jerde ornalasqan.

Alystan kózge túsetin qazaqtyń kıiz úıiniń ishine engen sátte úziktiń shetin aınaldyra tikken oıýdyń ásemdigi bir bólek.

Kıiz úıdiń aınalasynda eki altybaqan qurylǵan. Sol aýmaqta qamyspen qorshalǵan sadaq atý orny kelýshilerdiń qyzyǵýshylyǵyn týǵyzady.

Bul aýmaqta kópshilik sadaq atyp, arqan tartady. Balalar jaǵy atqa minip, asyq oınaıdy.

Kıiz úı ishinde ultymyzdyń barlyq qolóner týyndysy jıylǵan. Kerege tusqa ilingen ulttyq kıimder, batyrdyń bes qarýy, dala sal-serileri paıdalanǵan mýzykalyq aspaptar.

Qoı júninen basylǵan tekemet, ustalar soqqan kebeje, sandyq, jozy, aǵash tósek, ydys-aıaqtar men úı sharýasyna qajetti dúnıeler.

Joǵaryraq ilingen qasqyr men túlkiniń terisin de baıqaısyz.

Bizdiń qalada alǵash ret ashylǵan etnoaýyl jobasynyń jetekshisi Aıda Kerimqulova 2011 jyly ózi qurǵan «Sapa ka» jeńil ónerkásip ortalyǵyn qurǵan.

Búginde bir aıda 2000 dana mektep formasy, 100 dana uzatý kóılegi syndy jekelegen jáne memlekettik tapsyrystardy oryndap júr.

Ortalyqta 30 adam jumys isteıdi.

«Byltyr ǵana ashylǵan etnoaýyldy qurýdaǵy maqsatymyz – qazaqy dástúrimizden qol úzbeý. Biz buryn ǵımarat ishinde osyndaı joba istedik. Odan keıin «Dosan» aýylynda da boldy. Biraq ǵımarattyń tarlyǵy áser etip, «Dosan» aýylyndaǵy araqashyqtyq ta kelýshilerge qıyndyq týǵyzdy. Onyń ústine qazaqty jylqydan ajyrata almaısyz. Sondyqtan ortalyqtan jer qarastyryp, Qyrǵyzstan jáne Reseıden arab tuqymdy eki jylqy aldyrdyq. Qazir etnoaýyl kópshiliktiń qyzyǵýshylyǵyn týdyryp otyr», - deıdi ol.

Eske salsaq, budan buryn Qyzylordada respýblıkalyq «Kóktem nury» oqýshylar aıtysy ótkizildi.