Qyzylordada erikti jastar turmysy tómen otbasyna baspana syılady

QYZYLORDA. QazAqparat - Qyzylorda oblysy Qazaly aýdanynda erikti jastar turǵyn úıge muqtaj otbasyna baspana syılady, dep habarlaıdy QazAqparat tilshisi.

Budan buryn Qazaly aýdanyna qarasty Jankent aýylynda turatyn Qarlyǵa Matova turǵyn úıge muqtaj bolatyn. Onyń qolynda múmkindigi shekteýli uly, kelini jáne nemeresi bar edi. Bul otbasy uzaq jyldar boıy turǵyn úı qıyndyǵyn kórip keldi.

Jergilikti erikti jastar «Qareket» qaıyrymdylyq qory arqyly jalǵyzbasty anaǵa aýdan ortalyǵy - Áıteke bı kentinen jańa baspana syılady.

Qýanyshty rásimge aýdan ákimi Muhtar Orazbaev bardy. Aýdan basshysy erikti jastardyń jarqyn bastamasyna rızashylyǵyn bildirip, alǵysyn aıtty.

Baspananyń kiltin aýdandyq jastar resýrstyq ortalyǵynyń dırektory Asylhan Dáribaev jáne «Qareket» qaıyrymdylyq qorynyń Qazaly aýdany boıynsha eriktileriniń jetekshisi Aıdos Tańbyshov tabystady.

Baspanaǵa qol jetkizgen Qarlyǵa Matova qaıyrymdy jandarǵa alǵysyn bildirdi.

Aıta keteıik, qaıyrymdylyq qorynyń basty maqsaty - muqtaj jandarǵa, jetim-jesirlerge, múmkindigi shekteýli adamdarǵa, kópbalaly, jalǵyzbasty analarǵa baspana syılaý. Osyǵan deıin qordyń qoldaýymen 8 aýdan turǵyny baspanaǵa ıe boldy.