Qyzylordada eń úzdik mektepke 17 mln teńge tabys etildi
Tamyz keńesinde Qyzylorda oblysynyń ákimi Qyrymbek Kósherbaev zamanaýı bilim berý júıesindegi mańyzdy máselelerdi atap ótti. Sondaı-aq, oblys basshysy bilim alýshylardyń mamandyqtary men eńbek naryǵy suranysynyń sáıkes kelýi mańyzdy ekendigin aıtty.
«Bizdiń árdaıym nazarda ustaıtyn erekshe mańyzdy kórsetkishimiz - túlekterdiń jumyspen qamtylýy. Moıyndaý qajet, bizde bul máselede keleńsizdikter az emes. Túlekterdi bir mamandyq boıynsha daıarlaımyz, al olar múlde basqa saladan oryn tabady. Olardyń qabileti men naryqtaǵy jaǵdaıdy eskere otyryp, túlekterdi durys baǵyttaý - bizdiń mindetimiz», - dedi aımaq basshysy.
Búginde Syr óńiriniń bilim salasynda aıshyqty ister kóp. Atap aıtqanda, órender mektepke deıingi mekemelermen tolyq qamtylyp otyr. Oblysta úsh aýysymda birde-bir mektep joq. Sońǵy 5 jylda apattyq mektepter ornyna 45 mektep salynyp, bul másele de tolyqtaı sheshimin tapty.
2014 jyldan bastap Reseıdiń Máskeý men Sankt-Peterbýrg qalalaryndaǵy aldyńǵy qatarly oqý oryndarynda 452 qyzylordalyq stýdent Reseı Federatsııasy úkimetiniń granty esebinen bilim alýda. Bıyl alǵashqy 65 túlekti jumyspen qamtý máselesi sheshimin tapty. Sonymen birge, syrboıylyq jastarǵa mamandandyrylǵan «Kıberqaýipsizdik» jáne «Protsesterdi matematıkalyq modeldeý» salasynda M.V.Lomonosov atyndaǵy Máskeý Memlekettik ýnıversıtetine jyl saıyn 20 grant bólinedi. Budan basqa, Eýrazııalyq ekonomıkalyq qoǵamdastyqtyń Parlamentaralyq Assambleıasy aıasyndaǵy joǵary oqý oryndarymen yntymaqtastyq týraly memorandýmǵa qol qoıyldy. Joǵary oqý oryndaryna túsý emtıhandaryn úzdik tapsyrǵan Qyzylorda oblysy mektepteriniń túlekterine jyl saıyn Sankt-Peterbýrgta oqýǵa 10 bilim grantyn bóletin boldy. Aqparattandyrý men tehnologııalardy engizý boıynsha Tatarstan Respýblıkasyndaǵy Innopolıs ýnıversıtetinde aqparattyq jáne sandyq tehnologııalar boıynsha jyl saıyn taǵy 20 túlektiń bilim alýyna Tatarstan Prezıdentimen kelisim jasalǵan.
Sonymen qatar, UBT tapsyryp memlekettik grantty alýǵa birneshe ball jetpeı qalǵan aýyl mektepteriniń túlekterine aımaqqa qajetti mamandyqtar úshin oblys ákiminiń granty bólinedi.
«2013 jyldan bastap, jyl saıyn 100 daryndy ári talapty aýyl balalary, onyń ishinde, az qamtylǵan jáne kópbalaly otbasynan shyqqan jastardy elimizdiń beldi joǵarǵy oqý ornyna oblys ákiminiń grantymen oqýǵa joldaýdamyz. Bıyl oqý grantynyń sanyn 100-den 205-ke deıin, ıaǵnı 2 ese ulǵaıttyq. Osylaısha, búgingi tańda grant ıegerleriniń sany 900 adamǵa jetti. Bıylǵy ulttyq biryńǵaı testileýdiń qorytyndysy boıynsha oblys túlekteriniń ortasha kórsetkishi 85,2 baldy qurady. Bul byltyrmen salystyrǵanda 2,42 balǵa joǵary. Byltyr qorytyndys boıynsha túlekterdiń 97 paıyzy joǵary jáne orta arnaýly oqý oryndaryna túskenin maqtanyshpen atap ótýge bolady. Bıylǵy nátıje de jaqsy bolady dep úmittenemiz»,- dedi aımaq basshysy.
Birqatar oqytýshylar «Qazaqstan Respýblıkasy bilim berý isiniń qurmetti qyzmetkeri» tósbelgisine ıe boldy, «Ybyraı Altynsarın» medalimen, sondaı-aq oblys ákiminiń Qurmet gramotalary jáne alǵys hattarymen marapattaldy. Sonymen qatar, «Murager» mektebine «Úzdik orta bilim uıymy» nomınatsııasy boıynsha 17 mıllıon teńge tabystaldy.
«2018-2019 oqý jylynda oblystyń jalpy bilim beretin 294 mektebinde 154 559 oqýshyny oqytý josparlanyp otyr. 18 942 bala birinshi synypqa barady. Jańa oqý jylynda Qazaly jáne Jańaqorǵan aýdandarynda 300 orynǵa arnalǵan jańa mektepter paıdalanýǵa berildi. 2017-2018 oqý jylynda oblysta Qarmaqshy jáne Jańaqorǵan aýdandarynda 3 mektep jumysyn bastaǵan bolatyn. Budan basqa, jyldyń sońyna deıin Aralda 300 orynǵa jáne Qyzylordada 600 orynǵa arnalǵan mektepter salynady», - dedi oblystyq bilim basqarmasynyń basshysy Maıra Meldebekova.
Sharaǵa oblys ákimi Qyrymbek Kósherbaev, Qazaqstan Respýblıkasy Bilim jáne ǵylym mınıstrliginiń jaýapty hatshysy Aryn Órsarıev, «Nazarbaev Zııatkerlik mektepteri» derbes bilim berý uıymynyń basqarma tóraıymy Kúlásh Shamshıdınova, Bilim jáne ǵylym mınıstrligi janyndaǵy aqparattyq taldaý ortalyǵy prezıdentiniń mindetin atqarýshy Eldos Nurlanov, jergilikti bilim berý uıymdarynyń qyzmetkerleri men oblys muǵalimderi qatysty.