Qyzylordada elektr stansasy iske qosyldy
Batys Tuzkól ken ornyndaǵy gaz týrbınalyq elektr stansasy «Tuzkól Munaı Gaz Opereıtıng» JShS men «Petro Kazahstan ınk» kompanııalary qoldaýymen júzege asyryldy. Bas merdiger – «Trans Azııa Konstrakshn» JShS mekemesi. Elektr stansanyń qurylysy 2018 jyldyń 5 jeltoqsanynda bastalǵan bolatyn. Gaz týrbınaly elektrostansanyń jıyntyq qýaty - 16,5 MVt.
Atalmysh ıgilikti sharaǵa Qyzylorda oblysynyń ákimi Qýanyshbek Ysqaqov qatysty. Aımaq basshysy barsha sala mamandaryn jańa jobanyń júzege asyrylýymen quttyqtap, osy iri jobany júzege asyrýshylardy oblys ákiminiń alǵys hatymen marapattady.
«Munaıdyń óndirý, ıgerý Syr óńirinde qolǵa alynǵanyna shırek ǵasyrdan asty. Osy merzim ishinde aımaǵymyzda munaıdy ıgerýmen onnan astam kompanııa aınalysyp keledi. Bul óz kezeginde jergilikti myńdaǵan turǵynǵa jumys kózi bolyp otyr. Munyń syrtynda qanshama servıstik kompanııalar olarǵa qyzmet kórsetedi. Sondaı-aq,oblys bıýdjetine túsetin salyq kóleminiń artýyna da úlesin tıgizdi. Osylaısha, «qara altynnan» túsetin qyrýar qarjy esebinen aımaqtyń áleýmettik-ekonomıkalyq áleýeti artty. Ony aımaqtyń damý deńgeıinen kórýge áben bolady. Kompanııalardyń áleýmettik jaýapkershiligi negizinde atqarylyp jatqan ister maqtaýǵa turarlyq», - dedi oblys ákimi Q. Ysqaqov.