Qyzylordada ekstremıstik mazmundaǵy baspa ónimderin saqtaǵan turǵyn jaýapqa tartyldy

QYZYLORDA. QazAqparat-Qyzylorda oblystyq Іshki ister departamentiniń Ekstremızmge qarsy is-qımyl basqarmasynyń qyzmetkerleri tıisti tekserý jumystaryn júrgizý barysynda dinı alaýyzdyqty qozdyrýǵa baǵyttalǵan kitaptar saqtaǵan Qyzylorda qalasynyń turǵynyn anyqtaıdy, dep habarlady QazAqparat tilshisi oblystyq ІІD silteme jasap.

Departament málimetterine qaraǵanda, 1984 jyly týǵan kúdiktiden aıǵaq zat retinde kitaptar alynyp, tıisti saraptamalar taǵaıyndalǵan.

Arnaıy júrgizilgen sharalar barysynda ustalǵan azamattyń zańǵa qaıshy is-áreketi rastalyp, destrýktıvti dinı aǵymdy ustana otyryp, ol dinı alaýyzdyqty qozdyrýǵa baǵyttalǵan málimetter men materıaldar qamtylǵan ónimderdi saqtaǵany úshin Qazaqstan Respýblıkasy Ákimshilik quqyq buzýshylyq týraly kodeksiniń 453-baby, 4-bóligimen ákimshilik jaýapqa tartylyp, sottyń sheshimimen 70 aılyq eseptik kórsetkish kóleminde aıyppul tóleıtin boldy.

Osyǵan sáıkes, oblys turǵyndaryna ekstremıstik mazmundaǵy baspa ónimderin taratý maqsatynsyz saqtaǵany úshin jaýapkershilik qarastyrylǵanyn eskerte otyryp, ekstremıstik basylym ónimderiniń tizimi Qazaqstan Respýblıkasy prokýratýrasynyń resmı saıtynda ornalastyrylǵandyǵyn habarlaıdy.