Qyzylordada ekonomıkalyq qylmys boıynsha aıyptalǵan eki kásipker ustaldy

QYZYLORDA. QazAqparat - Qyzylordada eki kásipkerdiń iri kólemde salyq tóleýden jaltarý jónindegi isi áshkere boldy. Oblystyq memlekettik kirister departamenti ekonomıkalyq tergeý qyzmetiniń mamandary kúdiktilerdi ustady, dep habarlaıdy QazAqparat tilshisi departamentke silteme jasap.

Departamenttiń bas mamany Baqyt Ordanovanyń keltirgen derekterine súıensek, kásipker L.B. jáne onyń serigi J.E.-nyń aldyn ala kelisim boıynsha 2016 jyldyń tamyz aıy men 2017 jyldyń mamyr aıy aralyǵynda eki jaýapkershiligi shekteýli seriktestik arasynda jalpy somasy 386 mln 643 myń teńgeniń shot-faktýralary usynylǵan. Alaıda eshqandaı naqty taýar alynbaǵan.

Memleketke iri kólemdi zalal keltiriletin bul áreket QR QK 24-babynyń 3-bóligimen jáne 216-babynyń 2-bóligi 2, 3 tarmaqtarymen qarastyrylǵan qylmystyq quqyqbuzýshylyq bolyp tanylady.

Memlekettik kirister departamenti mamandarynyń taldaý esepterine sáıkes, shot-faktýralardy alǵan zańdy tulǵa osy shot-faktýralardy qoldanǵan jaǵdaıda, bıýdjetke túsetin 110 mln 469 myń teńge salyqtan  jaltarýǵa negiz bolar edi.

Ekonomıkalyq tergeý qyzmeti qylmystyq toptyq jospary aıaǵyna deıin jetkizbeı, eki kúdiktiniń bir-birine  55 mln teńge berýi kezinde ustady.

Qazirgi kezde bul is QR Qylmystyq kodeksiniń 216-baby 2-bóligi 2-tarmaǵy boıynsha sotqa joldandy.