Qyzylordada bıyl 4 adam Kongo-Qyrym bezgeginen qaıtys boldy
Óńirde Kongo-Qyrym gemorragııalyq qyzbasynyń epıdemıologııalyq ahýaly órship tur. Oblys boıynsha 33 naýqas tirkelip, onyń 14-i naqtylanǵan.
Ókinishke qaraı 4 adam kongo-qyrym gemorragııalyq qyzbasynan kóz jumdy.
Qaıtys bolǵan naýqastar – Qyzylorda qalasy, Jalaǵash, Shıeli aýdandarynyń turǵyndary.
«Qazirgi tańda Kongo-Qyrym gemorragııalyq qyzbasymen aýyryp, 1 naýqas em alýda. Tıisti medıtsınalyq em sharalary qoldanylǵan 9 naýqas qanaǵattanarlyq jaǵdaıda úılerine shyǵaryldy. Kongo-Qyrym gemorragııalyq qyzbasyn boldyrmaý, aldyn alý sharalary da kóptep júrgizilýde», – dedi oblystyq densaýlyq saqtaý basqarmasy basshysynyń orynbasary Jangeldi Myrzageldiuly.
Byltyr kene shaǵýdyń 238 jaǵdaıy anyqtalsa, bıyl 601 deregi tirkelgen. Sonymen qatar kenelerdiń arasynda aýrý qozdyrǵyshynyń anyqtalýy da ótken jylǵydan joǵary.
Byltyr oblys boıynsha 113 eldi meken qolaısyz aımaqtar qatarynda eseptelse, bıyl olardyń sany 116-ǵa jetti.
«Bıyl Kongo-Qyrym gemorragııalyq qyzbasynyń jańa mıkrooshaqtaryn anyqtaý maqsatynda 40 075 dana kene jınalyp zertteldi. Onyń ishinde 5174-i – eldi mekenderden, 16 765-i – janýarlardan, 17637-si – tabıǵattan, 496-sy aýrý oshaqtarynan jınalǵan. Barlyǵy 4527 synama zerttelip, 127-sinen oń nátıje anyqtalǵan. Oblys boıynsha medıtsınalyq mekemelerde KQGQ-men aýyratyn naýqastardy emdeý úshin vırýsqa qarsy preparattar, ımmýndalǵan plazma jáne t.b. qajetti dári-dármekter men qorǵanys qural-jabdyqtar qory jetkilikti mólsherde bar», – dedi oblystyq sanıtarııalyq-epıdemıologııalyq baqylaý departamenti basshysynyń orynbasary Álııa Ábdiqaıymova.
Aıta keteıik, epıdmaýsymnyń bastalýyna oraı qolaısyz eldi mekenderde asa qaýipti juqpaly aýrýǵa qarsy profılaktıkalyq sharalar belsendi júrip jatyr.
Eske salsaq, budan buryn Qyzylordada bıyl jiti ishek ınfektsııasyn juqtyrýshylar kóbeıgenin habarlaǵan edik.