Qyzylordada bir aı buryn joǵalyp ketken qarııanyń denesi tabyldy

QYZYLORDA. QazAqparat - Qyzylorda qalasynda bir aıǵa jýyq ýaqyt buryn joǵalyp ketken 72 jastaǵy qarııanyń máıiti dalalyq jerden tabyldy, dep habarlaıdy QazAqparat tilshisi.

Eske salsaq, Qyzylorda qalasynda turatyn qarııa 19 aqpanda úıinen belgisiz baǵytqa shyǵyp ketken .

Sodan beri úıine qaıta oralmaǵan.

Osyǵan baılanysty Qyzylorda qalalyq polıtsııa basqarmasy izdeý jarııalady. Bir aıǵa jýyq ýaqyt boıy qarııany izdestirý jumysy toqtaǵan joq.

«Oǵan qalalyq polıtsııa basqarmasynyń búkil jeke quramy, Ulttyq ulan sarbazdary, tótenshe jaǵdaılar departamenti, júzdegen eriktiler toby jáne jergilikti turǵyndar jumyldyryldy. Izdeýge arnaıy tehnıka qatystyryldy. 17 naýryz kúni saǵat 10:40 shamasynda qaladan birneshe shaqyrym jerdegi dalalyq aımaqtaǵy sheńgel arasynan joǵalǵan qarııanyń denesi tabyldy. Denesinde kózge kórinetin zorlyq-zombylyq belgileri baıqalmaıdy. Saraptama taǵaıyndaldy», - dep málim etti Qyzylorda qalalyq polıtsııa basqarmasynan.