Qyzylordada bes jylda Aral teńiz ultanyna 1,1 mıllıon gektar sekseýil otyrǵyzylady
Bul baǵytta kórshiles Ózbekstan tájirıbesi negizge alynady. Onda qysqy mezgilde sekseýil egip, ony kóktemde otyrǵyzý jumysy jolǵa qoıylǵan.
Oblys ákimi Gúlshara Ábdiqalyqova sol elden kelgen arnaıy delegatsııamen kezdesti. Otyrysqa Ózbekstan Respýblıkasy memlekettik orman sharýashylyǵy komıtetiniń tóraǵasy Nızomıdın Bakırov bastaǵan delegat ókilderi keldi.
Elimizdiń atynan QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıteti tóraǵasynyń mindetin atqarýshy Erlan Qutpanbaev boldy.
Jıynda aımaq basshysy Araldyń tartylýy Syr óńirine ǵana emes kórshiles memleketter úshin de asa mańyzdy máselege aınalǵanyn tilge tıek etti. Sebebi teńiz akvatorııasynyń tartylýy balyq sharýashylyǵyna da qatty áser etti. 1993 jyly 26 naýryzda Qyzylordada ótken Orta Azııa elderi basshylarynyń sammıtinde Araldy qutqarý boıynsha halyqaralyq qor qurý týraly sheshim qabyldandy. Bul ekologııalyq ahýaldy jaqsartýǵa jasalǵan qaryshty qadamdardyń biri boldy.
«Ortalyq Azııa aýmaǵyndaǵy memleket basshylarynyń sheshimimen halyqaralyq qarjy uıymdary men múddeli taraptar bul baǵytta qoldaý kórsetti. Nátıjesinde Aral teńiziniń tartylýy men teńizdiń soltústik bóligin saqtaý boıynsha birqatar jumystar atqaryldy. Atap aıtqanda, «Syrdarııa ózeniniń arnasyn retteý jáne Aral teńiziniń soltústik bóligin saqtaý» jobasy negizinde teńizdiń soltústik bóliginde balyqtyń 10-nan asa túri paıda boldy. Qazir Aral balyǵyna Eýropa men Azııa elderinen suranys joǵary. Teńiz tabanyndaǵy qumnyń kóshýin toqtatý maqsatynda «jasyl beldeýdi» damytý máselesi de qolǵa alyndy. Orman qoryn kóbeıtý jumystary sheńberinde 337 myń gektar jerge tal otyrǵyzyldy. Prezıdent Joldaýyndaǵy tapsyrmasy aıasynda 5 jyldyń ishinde teńiz ultanynyń 1,1 mıllıon gektar jerine sekseýil otyrǵyzý josparlanyp otyr. Bul rette Ózbekstan Respýblıkasynyń tájirıbesin paıdalanýymyz qajet. Sondyqtan eki eldiń birlesken jumysynyń arqasynda Araldyń kepken tabanyn kógaldandyrý máselesine oń yqpalyn tıgizedi dep oılaımyn», - dedi Gúlshara Ábdiqalyqova.
Aldaǵy kezeńde birlesken seriktestik aıasynda oblys aýmaǵyndaǵy teńiz ultanyna sekseýil egý, otyrǵyzý jumystary boıynsha kórshi eldiń tehnologııasy qoldanylady.