Qyzylordada «Baıqońyr-ınvest» halyqaralyq forýmy ótedi

           QYZYLORDA. QazAqparat - Qyzylorda oblysynyń 9 aıdaǵy  áleýmettik-ekonomıkalyq damý qorytyndysy óńir basshysynyń keńeıtilgen májilisinde talqylandy. Jalpy óńirdiń jetistikteri oń nátıjege ıe. Degenmen, alda atqarar jumystar da aýqymdy. Oblys ákimi Qyrymbek Kósherbaev endigi jerde úgit-nasıhatty emes, naqty is-qımyldy kúsheıtý qajettigin atap ótti. Bul týraly QazAqparat tilshisi habarlady.

Keńeıtilgen májiliste oblys ákiminiń orynbasarlary memlekettik baǵdarlamalardyń atqarylýy men Elbasy tapsyrmalarynyń oryndalýy barysy jaıly esep berdi.

Mysaly, jyl basynan beri agrarlyq salada ónim kólemin kóbeıtýde jáne aýylsharýashylyq ónimderin eksporttaýda turaqty ósim bar. Aımaq eńbekkerleri jarty mıllıonnan astam tonna kúrish jınap, kezekti ret rekordtyq kórsetkishke qol jetkizdi. Ortasha ónim kólemi gektaryna - 55,3 tsentnerden keledi.

Esepti kezeńde oblystyń ónerkásip kásiporyndarymen 547,9 mlrd. teńgeniń ónimi óndirildi. Jeńil, hımııa ónerkásibi jáne munaı óńdeý ónimderin óndirýdiń artýy esebinen óńdeý ónerkásibinde ósim 6,2 paıyzǵa qamtamasyz etildi (78,2 mlrd. teńgeniń  ónimi óndirildi).

«Nurly jer» baǵdarlamasynyń aıasynda paıdalanýǵa berilgen turǵyn úı kólemi 36,4 paıyzǵa ósip, 467,0 myń sharshy metrdi qurady. Bıyl oblysta 47 turǵyn úıdiń qurylysy júrgizilýde, onyń 24-i paıdalanýǵa berilgen.

Indýstrııalandyrý kartasy sheńberinde oblysta 20 joba júzege asyrylyp, búginde 16-sy tolyq óndiristik qýattylyqqa shyqty.

Indýstrııalyq-ınnovatsııalyq damý memlekettik baǵdarlamasy aıasynda iske qosylǵan kásiporyndarmen eksporttalǵan ónim kólemi sońǵy jyly 23 paıyzǵa ósti (2017 jyldyń 8 aıynda 3,9 mlrd.teńge), al ımporttaýshy elderdiń sany 8-den 11-ge artty (Reseı, Qyrǵyzstan, Ázerbaıjan, Danııa, Tájikstan, Aýǵanstan, Qytaı, Ulybrıtanııa, Polsha, AQSh, Taıvan).

«Halyqtyń ál-aýqatyn arttyrý - bizdiń basty mindetimiz. Nasıhat pen túsindirý jumystarynyń ýaqyty ótti. Endigi jerde naqty is-qımyldy kúsheıtetin kez keldi. Ásirese, jappaı kásipkerlikti damytý boıynsha. Ómirde óz ornyn tappaǵan jandar áleýmettik máseleniń týyndaýyna sebepker bolyp jatady. Sondyqtan, biz keleshekte eńbek naryǵynda suranysqa ıe mamandyqtar boıynsha jerlesterimizdi oqytýdy qolǵa alyp otyrmyz. Qýanatyn jaıt, bıyl mektep bitirgen qyzylordalyq túlekterdiń 97 paıyzy joǵary jáne orta arnaýly oqý oryndaryna tústi. Osylaısha, jastarǵa senimdi bolashaqqa baǵyt berip qana qoımaımyz, margınal jastardyń qatarynyń azaıýyna da óz úlesimizdi qosa alamyz», - dedi oblys ákimi.

Tek jyl basynan beri óńirge 11 eldiń ókilderi kelip, ónerkásip, kásiporyndar, aýyl sharýashylyǵy ónimderin qaıta óńdeý, bilim berý jáne taǵy basqa salalardaǵy birlesken jobalardy talqylady.

Aıta keteıik, 15-16 qarashada óńirge keletin ınvestorlardyń alańyna aınalǵan Qyzylorda men Baıqońyr qalalarynda kezekti "Baıqońyr-ınvest" halyqaralyq forýmy ótedi.