Qyzylordada bastaýysh synyp oqýshylary erteń qashyqtan oqıdy

QYZYLORDA. QazAqparat - Dúısenbi kúni Qyzylorda qalasynda qolaısyz aýa raıyna baılanysty 0-4 synyp oqýshylary qashyqtan oqytylady, dep habarlaıdy QazAqparat tilshisi.

Sońǵy kúnderi oblys ortalyǵynda qolaısyz aýa raıy qalyptasyp otyr.

«Osyǵan baılanysty balalardyń qaýipsizdigin qamtamasyz etý maqsatynda jalpy bilim beretin bilim berý uıymdaryndaǵy 0-4 synyp oqýshylary 17 sáýir kúni qashyqtan oqytylady. Aıta keteıik, bul qaladaǵy 56 mektep pen jeke mektepterdiń bastaýysh synyp oqýshylaryna qatysty», - dep málim etti Qyzylorda qalalyq bilim bóliminen.

Eske salsaq, 16 sáýirde kóktaıǵaq pen qatty jelge baılanysty Aqtóbe oblysynyń shekarasynan Aral aýdany ortalyǵyna deıingi jol ýchaskesi kóliktiń barlyq túri úshin jabylǵan bolatyn.

Sınoptıkter 17 sáýirde birqatar óńirde eskertý jarııalady. Qazgıdromet boljamynsha, Qyzylorda oblysynyń soltústigi men ortalyǵynda shańdy daýyl turady. Jel soltústik-batystan, soltústikten soǵady, kúshi 25 m/s artýy yqtımal. Túnde oblystyń soltústigi men ortalyǵynda 3 gradýs úsik kútiledi.