Qyzylordada balyqshylar qaýymdastyǵy quryldy

QYZYLORDA. QazAqparat - Qyzylorda oblysynyń balyq ósirýshileri men balyq sharýashylyǵy qurylymdary birlesip «Syr sýy marjany» zańdy tulǵalar qaýymdastyǵyn qurdy, dep habarlaıdy QazAqparat tilshisi oblystyq kásipkerler palatasynyń baspasóz qyzmetine silteme jasap.

Qaýymdastyqtyń negizgi maqsaty - qaýymdastyq músheleriniń múddesin tanytý jáne qorǵaý.

«Osy ýaqytqa deıin balyq sharýashylyǵymen aınalysatyn kásipkerler máselelerin árqaısysy óz betinshe sheship keldi. Sebebi, bastaryn biriktiretin arnaıy uıym bolmady. Sol sebepti bul azamattardyń problemalaryn sheshýde qıyndyqtar boldy. Qurylǵan qaýymdastyq aldaǵy ýaqytta atalmysh saladaǵy júıeli máselelerdi jedel ári sapaly sheshýge múmkindik beredi degen senimdemiz», - dedi oblystyq kásipkerler palatasynyń sarapshysy Alma Pirmanova.

Oblystyq kásipkerler palatasy balyq sharýashylyǵymen aınalysyp júrgen jeke jáne zańdy tulǵalarǵa arnalǵan túrli is-sharalardy uıymdastyryp keledi. Osy maqsatta ústimizdegi jyldyń aqpan-naýryz aılarynda birneshe ret «Balyq sharýashylyǵyn damytýdyń problemalary men múmkindikteri» taqyrybynda  teorııalyq semınar-trenıngter ótkizildi. Semınar-trenıngte balyq sharýashylyǵy nysandarynyń túrlerimen tanystyrý, kóldik-taýarly balyq sharýashylyǵynyń erekshelikteri, balyq ósirý, tamaqtandyrý, kútim jasaý joldary jáne oblysta osy salany damytý múmkinshilikterine qatysty máseleler talqylandy.

Ádilet QAŃTARBAEV