Qyzylordada balyq aýlap otyryp darııaǵa qulap ketken 80 jastaǵy keıýana qutqaryldy

QYZYLORDA. QazAqparat - Qyzylorda qalasynda qutqarýshylar balyq aýlap otyryp, darııaǵa batyp kete jazdaǵan 80 jastaǵy áıel kisini aman alyp qaldy, dep habarlaıdy QazAqparat tilshisi.

Oqıǵa búgin, 8 maýsymda Syrdarııa ózeniniń Qyzylorda qalasy tusyndaǵy aýmaqta bolǵan.

Sol ýaqytta 1942 jyly dúnıege kelgen azamatsha balyq aýlap otyrǵan. Bir zatty almaq bolyp tómen qaraı eńkeıgen sátinde darııaǵa qulap ketken.

«Sol aýmaqqa jaqyn jerde tótenshe jaǵdaılar qyzmetiniń mamandary oqý-jattyǵý jıynyn ótkizip jatqan bolatyn. Oblystyq tótenshe jaǵdaılar qyzmeti jedel qutqarý jasaǵynyń súńgýirlik-qutqarý bólimshesiniń bas qutqarýshysy Baǵdat Áljanov pen qutqarýshy bólimshe qutqarýshysy Erkebulan Orazbekov qarııanyń darııaǵa qulap ketkenin ańǵaryp, dereý ony qutqarýǵa umtylady. Qarııa derek sýdan shyǵarylyp, qutqarýshylar onyń ómirin saqtap qaldy», - dedi Qyzylorda oblystyq tótenshe jaǵdaılar departamenti órt sóndirý jáne avarııalyq-qutqarý jumystary qyzmetiniń baspasóz hatshysy Álııa Erejepova.

Eske sala keteıik, budan buryn Qyzylordada sýǵa batyp ketken elordalyq jasóspirimniń denesi tabylǵanyn habarlaǵan edik.