Qyzylordada balalarǵa arnalǵan arheologııalyq lager ashylmaq
Atalmysh joba Elbasy Nursultan Nazarbaevtyń «Uly dalanyń jeti qyry» maqalasyna oraı qolǵa alynbaq. Keler jyldan bastap Qyzylorda oblystyq tarıhı-ólketaný murajaıynyń qyzmetkerleri birneshe iri jobany júzege asyrýdy josparlap otyr. Solardyń biri - balalarǵa arnalǵan «Arheolog» lageriniń ashylýy. Balalar Syǵanaq jáne Jankent qalalarynyń qazba jumystaryna qatysady dep kútilýde.
«Elbasynyń «Uly dalanyń jeti qyry» maqalasy ulan-ǵaıyr dalamyzdyń álemdik keńistikte zor orny baryn dáleldeı túsetin derekterge toly. Rasynda, bizdiń dalamyzda kezinde qanshama oqıǵalar boldy. Adamzattyń atqa miný mádenıeti, uly daladaǵy ejelgi metallýrgııa, ań stıli, altyn adam, túrki áleminiń besigi, Uly Jibek joly sekildi uǵymdar - bizdiń sanamyzǵa sińgen dúnıeler. Sondaı-aq Qazaqstan - alma men qyzǵaldyqtyń otany ekenin jer júzindegi jurt biledi. Endigi kezekte, tarıhı sanany jańǵyrta otyryp, arhıv máselesine nazar aýdaryp, uly dalanyń esimderin ulyqtaýǵa kóńil bóletin bolamyz», - dedi oblystyq tarıhı-ólketaný murajaıynyń ǵylymı qyzmetkeri Ashat Saılaý.
Onyń aıtýynsha, túrki halyqtarynyń damýynda Syr óńiriniń mańyzy aıryqsha. Darııa boıynda túrki jáne qazaq uǵymynda óz orny bar Qorqyt ata kesheni, Jankent, Shirik Rabat, Syǵanaq kóne qalalary ornalasqan. Sondaı-aq halqymyz ómirindegi kóptegen tuǵyrly tulǵalar da osy óńirde dúnıege kelip, aıdaı álemge esimin tanytty.
«Biz birneshe jobany usyndyq. Eger olar qarjylansa, keler jyldan bastap júzege asyramyz. Sonymen qatar, balalarǵa arnalǵan arnaıy arheologııalyq lager ashýdy usynyp otyrmyz. Oqýshylardan quralǵan top 20 kún ishinde ortaǵasyrlyq kóne Syǵanaq jáne Jankent qalalarynyń qazba jumystaryna qatystyrylady. Sondaı-aq, lagerde ǵalymdarmen kezdesýler, qasıetti nysandarǵa ekspedıtsııalar men ekskýrsııalar uıymdastyrylady», - dedi Ashat Saılaý.
Aıta ketý kerek, «Qazaqstannyń qasıetti nysandary» jobasy aıasynda oblystyq murajaı «Qyzylorda oblysynyń kıeli jerlerine saıahat» jobasyn júzege asyrýda. Búginde 400 bala ortaǵasyrlyq kóne qalalardy jáne sáýlet eskertkishterine saıahat jasap, qasıetti jerlerdi aralady.
Esterińizge sala ketelik, Syr óńirindegi Syǵanaq qalashyǵyn etonotýrızm ortalyǵyna aınaldyrý jumystary júrgizildi. Bıylǵy qazan aıynyń sońynda Syǵanaq qalashyǵy týrıstik nysan retinde ashyldy.