Qyzylordada balabaqshadan órt shyǵyp 25 bala men 7 qyzmetker qaýipsiz jerge shyǵaryldy
Oqıǵa búgin, 13 jeltoqsanda saǵat 10.00 shamasynda Jańaqorǵan aýdanyndaǵy Jańaaryq aýylynda bolǵan. Eldi mekendegi jekemenshik balabaqsha shatyrynyń aǵash konstrýktsııasynan órt shyqqan.
«Órt sóndirý qyzmeti kelgenge deıin 25 bala men 7 qyzmetker qaýipsiz jerge shyǵyp úlgergen. Saǵat 10.29-da órttiń beti qaıtarylyp, saǵat 10.37-da tolyq sóndirilgen. Órt saldarynan zardap shekkender men qaza tapqandar joq. Órttiń shyǵý sebebi anyqtalýda. Oqıǵa ornynda tótenshe jaǵdaılar departamentinen 14 qyzmetker 3 tehnıkamen bardy», - dep málim etti Qyzylorda oblystyq tótenshe jaǵdaılar departamentinen.
Vedomstvo málimetinshe, departament mamandarynan ózge erikti órt sóndirý qurylymy, aýdandyq polıtsııa bóliminen mamandar jumys atqardy.
Eske salsaq, budan buryn Qyzylorda oblysynda ken ornynda gazǵa ýlanǵan eki kúzetshi kóz jumdy.