Qyzylordada balabaqsha sábıleri mingen jeńil kólik apatqa ushyrady

QYZYLORDA. QazAqparat - Qyzylorda qalasynda balabaqsha sábıleri mingen jeńil kólik jol-kólik oqıǵasyna ushyrady, dep habarlaıdy QazAqparat tilshisi.

Jol-kólik oqıǵasy búgin, 15 qyrkúıekte Qyzylorda qalasynyń sol jaǵalaýynda ornalasqan «Bolashaq» ýnıversıtetiniń mańyndaǵy jol qıylysynda bolǵan.

«Oqıǵa barysynda «Honda Odyssey» jáne «Hyundai Santa fe» kólikteri soqtyǵysyp qalǵan. «Honda Odyssey» kóligi qaladaǵy balabaqshanyń birine tıesili bolǵan. Atalǵan kólikke mingen sábılerge oblystyq kópsalaly balalar aýrýhanasynda alǵashqy medıtsınalyq kómek kórsetildi. Atalǵan jol-kólik oqıǵasy boıynsha saraptama taǵaıyndaldy», - dep málim etti Qyzylorda qalalyq polıtsııa basqarmasynan.

Eske salsaq, budan buryn Qyzylordada jasóspirimdi qaǵyp, qashyp ketken júrgizýshi ustaldy.