Qyzylordada baǵa turaqtylyǵyn qamtamasyz etý maqsatynda ne istelip jatyr
Oblystyq aýyl sharýashylyǵy basqarmasy, Qyzylorda qalasy jáne barlyq aýdan ákimdigi tarapynan áleýmettik saýda oryndaryndaǵy ónimderdiń baǵasyna kún saıyn monıtorıng júrgizilýde.
Baǵanyń negizsiz ósýine jol bermeý úshin oblystyń turaqtandyrý qorynan taýarlyq ınterventsııalar júrgizý, sondaı-aq «aınalym» shema boıynsha baǵany turaqtandyrý mehanızmi aıasynda zaem berý arqyly sharalar qabyldanýda.
«Oblysta baǵa turaqtandyrý maqsatynda óńirlik turaqtandyrý qory jumys jasaıdy. Ónim qorlaryn qalyptastyrý maqsatynda oblystyq bıýdjetten sońǵy úsh jylda (2020-2022) 3,4 mlrd. teńge bólindi.
Qazirgi tańda turaqtandyrý qorynda 1451,2 tonna ónim bar. Onyń ishinde 394,7 tonna birinshi surypty bıdaı uny, 64,1 tonna qaraqumyq jarmasy, 172,8 tonna kúrish, 48,4 tonna makaron, 108,4 tonna kartop, 200 tonna basty pııaz, 90,9 tonna kúnbaǵys maıy, 185,0 tonna sábiz, 50,0 tonna qyryqqabat, 136,9 tonna qant ónimi bar», - dep málim etti Qyzylorda oblystyq aýyl sharýashylyǵy basqarmasynan.
Búgingi kúni «aınalym shemasy» boıynsha 973 mln. teńge 18 kásipkerlik sýbektilerine zaem berildi. Osy zaem alǵan kásipkerlerdiń 19 túrli áleýmettik mańyzy bar azyq-túlik jáne turaqtandyrý qoryndaǵy ónimder «Baıqońyr» ÁKK qarasty Qyzylorda qalasynda ornalasqan 36 áleýmettik dúkende jáne qosymsha 14 iri sýpermarkette kelisim negizinde ashylǵan áleýmettik buryshtarda naryqtan tómen baǵada satylýda.
«Barlyq áleýmettik dúkende nan 55, qant 263, ósimdik maıy 630, kartop 130, sábiz 130, basty pııaz 65, qyryqqabat 90, 1 sortty un 135, qaraqumyq jarmasy 415, kúrish 200, makaron 200, sıyr eti 1650, taýyq eti (okorochka) 785, jumyrtqa 32, sút 280, aıran 225, súzbe 1283, sary maı 2504, tuz 40 teńgeden satylýda», - dep málim etti basqarmadan.
Vedomstvo málimetinshe, nan baǵasyn 90 teńgeden artyq emes baǵada satýdy qamtamasyz etý maqsatynda naýbaıhana ıelerimen kelissózder júrgizilgen. Nátıjesinde nan naýbaıhanadan 80-85 teńgeden bosatylyp, bólshek saýdada 90 teńgeden asyrmaı satý jóninde kelisildi.
Bıylǵy jyldyń qańtar men tamyz aılary aralyǵynda respýblıka boıynsha nan baǵasyn turaqtandyrý maqsatynda QR Aýyl sharýashylyǵy mınıstrligi men «Azyq-túlik kelisim shart korporatsııasy» UK» AQ-men astyq óndirmeıtin ońtústik óńirlerge arzandatylǵan bıdaı bólý sharalary qabyldanýda.
2021 jyldyń jeltoqsan aıynan bastap aptasyna bir ret «Baıqońyr» ÁKK» AQ uıymdastyrýymen Qyzylorda qalasy men barlyq aýdandar boıynsha turaqtandyrý qorynyń jáne onyń qaryz alyp otyrǵan áriptesteri arqyly 389,5 tonna áleýmettik mańyzy bar azyq-túlik ónimderi «Kólik ústinen» tómen baǵamen satylyp keldi.
Jalpy oblysta saýda oryndarynda azyq-túlik taýarlarynyń qory jetkilikti, azyq-túlik ónimderiniń tapshylyǵy baıqalmaıdy.
Eske salsaq, Qyzylordada «Óńirlik geoaqparattyq júıe» jobasy qolǵa alyndy.