Qyzylordada Azamattyq forým ótip jatyr

QYZYLORDA. QazAqparat - Búgin Qyzylordada bes kúnge sozylatyn «Qoǵam jáne memleket: seriktestik pen damýdyń 30 jyly «Birgemiz» atty IX oblystyq Azamattyq forým bastaldy, dep habarlaıdy QazAqparat tilshisi.

Azamattyq forýmǵa oblys ákiminiń orynbasary Serik Ahmet, Úkimettik emes uıymdar jetekshileri, sarapshylar, bıznes qurylym ókilderi, memlekettik organ qyzmetkerleri, kásipodaq uıymdary qatysýda.

Azamattyq qoǵam aptalyǵy sheńberinde Qazaqstan Respýblıkasynda Azamattyq qoǵamdy damytý tujyrymdamasynyń negizgi baǵyttary talqylandy. Atap aıtqanda, forýmda azamattardyń sheshim qabyldaýǵa qatysýy; qoǵamdyq baqylaý – shynaıylyq pen múmkindikter, ÚEU básekege qabilettiligi: tabys faktorlary, táýekelder, perspektıvalar; qoǵam, memleket jáne bıznes dıalogy atty baǵyttar qamtyldy. Sonymen qatar, forýmda buǵan deıingi berilgen usynystardyń naqty júzege asýy sóz boldy.

Delegattar onlaın formatta respýblıkalyq forýmnyń sarapshylyq, pikirtalas jáne oqytý sharalaryna qatysýyna múmkindigi bar. Sol arqyly elemizdegi azamattyq qoǵamnyń damýy boıynsha óz suraqtaryn qoıa alady. Bul rette, Aqparat jáne qoǵamdyq damý mınıstrligi belsendi uıym ókilderin eldegi ózekti máselelerdi eskere otyryp Azamattyq forýmnyń kún tártibin qalyptastyrýǵa atsalysýǵa shaqyrady.

Jergilikti forým jumysyna 200-den astam ÚEU, memlekettik organdar, sarapshylar qaýymdastyǵynyń ókilderi qatysýda.