Qyzylordada áıgili «Shahnamaǵa» arnalǵan kórme ashyldy

QYZYLORDA.  QazAqparat - Qyzylordadaǵy kórkemsýret galereıasynda «Fırdoýsıdiń Shahnamasy Turmaǵambet Іztileýulynyń týǵan jerinde» ataýymen kórme ótti. Bul sharany Qyzylorda oblysy ákimdigi men Iran Islam Respýblıkasynyń Qazaqstandaǵy elshiligi birlese uıymdastyrdy, dep habarlaıdy QazAqparat.

Kórmeniń ashylý saltanatyna Iran Islam Respýblıkasynyń Qazaqstandaǵy elshiliginiń keńesshisi Masýd sheıh Zeınedın arnaıy keldi. Ol óz sózinde mundaı sharalardyń eki eldiń ózara tarıhı-mádenı baılanysynyń ilgerileýine septigin tıgizetinine toqtalyp ótti.

«Fırdoýsı myń jyl buryn jazǵan áıgili shyǵarmasymen parsy tili men ırandyq halyqtyń danalyǵyn dáriptedi. Ony urpaqqa máńgilikke qaldyrdy. Sol qundy dúnıeni qazaq halqyna jetkizýde Turmaǵambet Іztileýulynyń eńbegi zor. Sondyqtan olardyń sońynda qaldyrǵan muralary barlyǵymyzǵa ortaq dúnıe dep sanaýǵa tolyq negiz bar»,- dedi Masýd sheıh Zeınedın.

 

Kórmede «Shahnama» shyǵarmasynyń qazaqsha nusqasy, shyǵarma mazmunyn sıpattaıtyn 30-ǵa jýyq kartına men Irannyń dekoratıvti-qoldanbaly qolóner týyndylary qoıylǵan. Kórme jumysy maýsymnyń 6-na deıin jalǵasady dep josparlanyp otyr.

«Shyǵystyń ataǵy jer júzine málim jeti aqynynyń biri retinde baǵalanatyn Fırdoýsı jyrlaǵan «Shahnama» dastany - túrki halyqtarynyń tarıhyn zertteýde súbeli eńbektiń biri. Bul dastandy Turmaǵambet Іztileýuly qazaq tilinde kórkem tilmen sheber jetkize bildi. Oǵan osyndaı usynys jasaǵan memleket jáne qoǵam qaıratkeri Temirbek Júrgenov te Syr óńiriniń perzenti ekeni búgingi býynǵa zor maqtanysh»,- dedi oblysy ákiminiń orynbasary Rýslan Rústemov.
  

Ádiljan Úmbet