Qyzylordada aýyl turǵyny tórt kúnnen beri tabylmaı jatyr

QYZYLORDA. QazAqparat - Qyzylorda oblysy Jańaqorǵan aýdanynyń turǵyny tórt kúnnen beri tabylmaı jatyr, dep habarlaıdy QazAqparat tilshisi.

Bul jóninde aýdandyq polıtsııa bólimi habarlady.

Málim bolǵanyndaı, Qojamberdi aýylynyń 44 jastaǵy turǵyny Asylbekov Abaıhan 18 qyrkúıekte tańǵy saǵat 5:00 shamasynda belgisiz baǵytqa shyǵyp ketken. Sodan beri qaıta oralmaǵan.

«Ústinde qara sporttyq kıim bolǵan, aıaǵyna aq krossovka kıgen. Habar-osharsyz ketý deregi boıynsha qandaıda bir málimet bolǵan jaǵdaıda Jańaqorǵan aýdanynyń Polıtsııa bólimine, 8-(72435) 24-1-55, 24-1-58 nemese 102 telefondaryna habarlasýdy suraımyz», - delingen habarlamada.

Eske salsaq, budan buryn Qyzylordada eki aı habarsyz ketken 26 jastaǵy turǵyn aman-esen tabylǵanyn habarlaǵan edik.