Qyzylordada aýyl áıelderiniń oblystyq sleti ótti
Atalǵan shara Birikken Ulttar Uıymynyń Bas Assambleıasynyń qararyna sáıkes qazannyń 15-i halyqaralyq aýyl áıelderi kúnine oraılastyryldy. Qyzylorda oblysynda pandemııadan keıin qaıta jańǵyrǵan bul sharaǵa oblystyq ishki saıasat basqarmasynyń basshysy, oblys ákimi janyndaǵy áıelder isteri jáne otbasylyq-demografııalyq saıasat jónindegi komıssııa tóraǵasynyń orynbasary Mıra Qazbekova men ártúrli salada tabysty eńbek etip júrgen názik jandylar qatysty.
Sletke qatysýshylar aldymen Tań aýylynyń tynys-tirshiligimen tanysty. Bul eldi meken metsenat, osy aýyldyń týmasy Imamzada Shaǵyrtaevtyń demeýshiligimen oblystaǵy áleýeti joǵary, turǵyndardyń turmysy jaqsy óńirge aınaldy. 2020 jyly kásipker aýyl ishin abattandyrý maqsatynda óz qarjysy esebinen 50 mln. teńge bóldi. Aýylda kúrish zaýyty iske qosyldy. Et óńdeıtin tseh ashylyp, 5 gektar aýmaqqa alma aǵashyn egildi. Aýyl halqy turaqty jumyspen qamtylǵan. Munan bólek, balabaqsha ǵımaraty jańǵyrtylyp, sport kesheni salynǵan.
Slet qatysqan kásipker áıelder ónimderin kópshilik nazaryna usynyp, ulttyq qolóner buıymdarynyń kórmesi el nazaryna usynyldy. Ártúrli salada jetistikke jetken áıel analar óz tájirıbesimen bólisti.
Slet sheńberinde Oblys ákimi janyndaǵy áıelder isteri jáne otbasylyq-demografııalyq saıasat jónindegi komıssııanyń otyrysy ótti. Qyzylorda oblystyq Qazaqstan Assambleıasy janyndaǵy Analar keńesi men oblystyq áıelder keńesi birlesip áıel kásipkerlerdiń semınar-trenıngin uıymdastyrdy.
Búgingi kúni oblysta 823 myńnan astam turǵyn bolsa, onyń 410 myńǵa jýyǵy áıelder (49%). Onyń ishinde, 185 462 áıel qalada, 224 myńnan astamy aýylda ómir súrýde. Aıta ketý kerek , aımaqta 38 706 kópbalaly ana tursa, onyń 4363 – «Altyn alqa», 9655 – «Kúmis alqa» ıegerleri.
Sondaı-aq, medıtsına qyzmetkerleriniń 87, pedagogtardyń 73, jalpy bıýdjettik sala qyzmetkerleriniń 60 paıyzy názik jandylardyń úlesinde. Al barlyq deńgeıdegi máslıhattardaǵy 152 depýtattyń 39 áıelder quraıdy (26 %).
Eske salsaq, budan buryn oblys ákimi Gúlshara Ábdiqalyqova qyzylordalyq isker áıelder ókilderimen kezdesti.