Qyzylordada Analar keńesi bılik ókilettikterin qaıta bólý máselelerin talqylady

QYZYLORDA. QazAqparat -Qyzylordada oblystyq Qazaqstan halqy Assambleıasy men Analar keńesi Elbasynyń bılik tarmaqtary arasynda ókilettikterdi qaıta bólý jónindegi úndeýin jáne «Qazaqstannyń úshinshi jańǵyrýy: jahandyq básekege qabilettilik» atty Joldaýyn talqylady, dep habarlaıdy QazAqparat HAA tilshisi aımaqtyq Assambleıaǵa silteme jasap.

Sharaǵa «Qoǵamdyq kelisim» KMM dırektory Ýalıhan Ibraev, Qorqyt Ata atyndaǵy QMÝ professory, tarıh ǵylymdarynyń kandıdaty, «Aq bosaǵa» qoǵamdyq birlestiginiń tóraıymyMerýert Ańsatova, Qorqyt Ata atyndaǵy QMÝ dotsenti, zań ǵylymdarynyń kandıdaty, kásibı medıatorJanna Isaeva, «Clavıane» qoǵamdyq mádenı ortalyǵy»  birlestiginiń tóraıymy  Galına Şerbakova, «Atameken» otbasylyq úlgidegi balalar aýylynyń dırektory, oblystyq Analar keńesiniń múshesiLıza Skakova, Syrdarııa aýdany A.Toqmaǵambetov aýyldyq okrýginiń Analar keńesiniń tóraıymy Zlıha Syzdyqova qatysty.

«Úndeýde usynylyp otyrǵan saıası ózgerister bolashaǵymyzdy tuǵyrly, eldigimizdi berik etetini sózsiz. Bul  táýelsiz memleketimizdiń demokratııalyq baǵytta ósip-órkendep kele jatqandyǵynyń kórinisi. Táýelsizdiktiń alǵashqy jyldaryndaǵy kúshti prezıdenttik vertıkal bizge memleketti qalyptastyrýda kezdesken qıyndyqtardy eńserý úshin qajet boldy. Osynyń nátıjesinde qazirgi tańda kóp jetistikterge qol jetkizildi. Ult kóshbasshysy osy jetistikpen toqtap qalmaı, saıası júıeni odan ary demokratııalandyrý qadamyn jasap otyr. Munyń ózi memleketti basqarý júıesiniń tıimdiligin barynsha arttyryp, elimizdiń álem aldyndaǵy bedelin burynǵydan da joǵarylata túsetindigi sózsiz. Qazaqstandyqtar  bul ózgeristerdi el damýyndaǵy eleýli kezeń retinde baǵalap otyr. Sonymen qatar, sheteldik sarapshylar da Prezıdent bastamasynyń tek  elimiz úshin ǵana emes, aımaqtyq saıasatta da mańyzdy ekendigin atap kórsetýde», - dedi «Qoǵamdyq kelisim» KMM  dırektory.

Jıynǵa qatysýshylar «Qazaqstannyń úshinshi jańǵyrýy: jahandyq básekege qabilettilik» Joldaýynyń negizgi baǵyttary týraly aıtyp, aýqymdy tapsyrmalardy júzege asyrý joldary men strategııalyq qujattyń negizgi basymdyqtaryna toqtaldy.

Sondaı-aq, Memleket basshysynyń azyq-túlik taýarlarynyń eksportyn ulǵaıtý, «Nurly jer», jumyspen qamtý jáne jappaı kásipkerlikti damytý baǵdarlamalaryn tıimdi júzege asyrý, sondaı-aq úlken qalalar men olarǵa jaqyn ornalasqan eldi mekender arasyndaǵy kólik qatynasyn, memlekettik-jekemenshik seriktestik pen bilim sapasyn jaqsartý, úsh tildi bilimdi damytý, adamı kapıtal sapasyn jaqsartý jáne t.b. máseleler boıynsha oı-pikirler ortaǵa salynyp, talqylandy.