Qyzylordada alıment tóleýden qasaqana jaltarǵan azamat sottaldy
Bıyl oblysta alıment tóleýge baılanysty qaryz bereshegi 379 mln teńgeni quraǵan. Onyń ishinde 907 óndiris aıaqtalyp, bereshek 244 mln teńgege tómendedi.
«Prokýrorlar tarapynan jyl basynan 15 usyný engizildi. Nátıjesinde 66 boryshker ákimshilik jaýaptylyqqa tartylyp, 52,4 mln teńge óndirildi. Al 2 boryshker QR Qylmystyq kodeksiniń 139-babymen sottaldy. Máselen, kámeletke tolmaǵan balalaryna 3 aıdan astam 697 500 teńge alıment tóleýden jaltarǵan azamat sottyń sheshimin qasaqana oryndamaǵan. Qyzylorda oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynyń úkimimen boryshker kináli dep tanyldy. Oǵan 1 jyl merzimge bas bostandyǵyn shekteý jazasy taǵaıyndaldy», - dep málim etti Qyzylorda oblystyq prokýratýrasynan.
Vedomstvo málimetinshe, prokýrorlyq den qoıý aktisiniń nátıjesimen boryshkerlerden turǵyn úıi, avtokóligi alynyp, óndirip alýshylardyń menshigine tabystaldy.
Prokýrorlar yqpalymen oblys kóleminde alıment boıynsha bereshek birshama azaıdy.
Eske salsaq, budan buryn alıment tólemeıtinder qaı óńirde kóp ekeni belgili boldy.