Qyzylordada «Alǵashqy jumys orny» jobasy júzege asýda

QYZYLORDA. QazAqparat - Qyzylorda oblysynda jastar úshin «Alǵashqy jumys orny» jobasy júzege asa bastady, dep habarlaıdy QazAqparat tilshisi.

Sońǵy úsh jylda 15-28 jas aralyǵyndaǵy jastardyń jalpy sanynda oqymaıtyn, jumys istemeıtin jáne óz biliktiligin arttyrmaıtyn jastardyń úlesi kóbeıdi. Mundaı azamattar NEET sanatyndaǵy jastar qatarynda sanalady.

Búginde olardy jumyspen qamtý maqsatynda is-sharalar iske asýda. Nátıjesinde atalǵan sanattaǵy jastar úshin «Alǵashqy jumys orny» jobasy qolǵa alynǵan. Bıyl osy jobamen 147 adamdy eńbekpen qamtý josparlanýda.
Bul baǵytta oblystyq «Jastar resýrstyq ortalyǵynda» NEET sanatyndaǵy jastarmen jumys jasaý bólimi quryldy. Oblys boıynsha jastardyń derekqor bazasyn jasaqtaý maqsatynda adrestik jumystar bastaý aldy.
«Qazirgi tańda 1 naýryzǵa deıin oblys ortalyǵy men aýdan ortalyqtarynda adrestik jumystar jalǵasýda. Atalmysh jumystar aıaqtalǵasyn tıisti derekqor bazasy jasalady. Atalǵan sanattaǵy jastardyń sanyn azaıtý, olardy oqytý, jumyspen qamtý, áleýmettendirý, kásipkerlikke baýlý jáne ózge baǵyttar boıynsha tıisti salalarǵa usynystar beriledi», - dedi oblystyq jastar resýrstyq ortalyǵynyń dırektory Asqar Qurmash.
Joba aıasynda túlekterdiń alǵan mamandyǵy boıynsha jumys oryndary qurylady. Jalaqyny sýbsıdııalaý merzimi 18 aıdan aspaıdy. Osy jyly jobaǵa qatysýshylardyń jalaqysy 91890 teńgege deıin kóterilýde. Jergilikti bıýdjetten 108,1 mln.teńge qarjy bólindi. Aldaǵy ýaqytta respýblıkalyq bıýdjettiń naqtylanýyna 1000 adamdy qamtý úshin qosymsha qarjy qajettiligi týraly usynystar joldandy. Al, joǵarǵy jáne arnaýly orta oqý oryndarynyń túlekteri úshin jumys tájirıbesin jınaqtaý maqsatynda uıymdastyrylatyn jastar praktıkasyna 2091 adamǵa 960,7 mln.teńge bólinip otyr.
«Memleket basshysynyń tapsyrmasyna sáıkes bıylǵy jyldan bastap jastar praktıkasyna qatysýshylardyń jalaqysy 76575 teńgeden 91890 teńgege deıin kóterildi. Qatysý merzimi 6 aıdan 12 aıǵa deıin ulǵaıtylýda. Qatysýshylar sanyn 5 myńǵa deıin kóbeıtý josparlanýda», - dedi oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Janar Dáýletbaeva.
Aıta ketetin jaıt, jumys kúshi jetispeıtin soltústik óńirlerdegi de bos jumys oryndary usynylady.
Eske salsaq, Qyzylordada «Qaýipsizdikti qamtamasyz etýdegi servıstik tásil» jobasy júzege asyrylýda.