Qyzylordada 3 713 jasóspirim «Pfizer» vaktsınasyn saldyrdy
Óńirde búginge deıin koronavırýsqa qarsy vaktsınanyń birinshi komponentimen 403 574 adam qamtyldy. Bul - tıisti kontıngenttiń 89,2 paıyzy. Al tolyq vaktsınatsııadan ótkender sany - 345 089 adam, ol tıisti kontıngenttiń 76,3 paıyzyn quraıdy.
«Oblysta turaqty ujymdyq ımmýnıtet tolyq qalyptasty dep aıta almaımyz. Vaktsına alǵandar arasynda ekpe tólqujatyn satyp alǵandar bolýy múmkin. Sondyqtan áli de qorǵanys deńgeıin arttyrý qajet. Óńirde koronavırýs juqtyrýdyń táýliktik kórsetkishi tómendedi. Álemdegi jaǵdaı saqtyq sharalaryn álsiretpeýdi áli de qajet etedi», - dedi oblystyń Bas memlekettik sanıtarııalyq dárigeri Dınara Janabergenova.
Ótken táýlikte 6 derek anyqtaldy. Onyń 5-eýi vaktsına almaǵan adamdar arasynda anyqtalyp otyr.
Bıyl koronavırýs ınfektsııasy mektep oqýshylary, stýdentter arasynda jıi tirkelýde. Vaktsınatsııa bastalǵan 2 apta ishinde 12-17 jas aralyǵyndaǵy 3 713 jasóspirim «Pfizer» vaktsınasyn saldyrdy.
Vedomstvo málimetinshe, 22 qarashadan bastap stýdentter arasynda koronavırýs juqtyrýdyń birde-bir deregi tirkelgen joq. Sondaı-aq «Pfizer» vaktsınasymen ımmýnızatsııalanǵan júkti áıelder sany - 686, laktatsııa kezeńindegi áıelder sany - 648 adam.
«Álemniń birneshe elinde «omıkron» shtamy anyqtalyp úlgerdi. Bul - bizdiń elge de tasymaldanýy yqtımal jaǵdaı. Sebebi halyqaralyq mıgratsııa bar. Jańa shtamǵa tek vaktsınatsııalaý arqyly ǵana tótep berýge bolady. Sondyqtan koronavırýstyń jańa shtamyna qarsy turý úshin revaktsınatsııadan ótýdiń de mańyzdylyǵy joǵary. Sebebi, qorǵanysh deńgeıi álsiregen aǵza vırýs juqtyrýǵa beıim keledi. Oblysymyzda revaktsınatsııalaý 22 qarashada bastaldy, sodan beri barlyǵy 202 adam qosymsha ekpe saldyrdy «, - dedi D.Jańabergenova.