Qyzylordada 2500 oram qamys órtenip ketti
02:37, 07 Naýryz 2022
QYZYLORDA. QazAqparat - Qyzylorda oblysy Qazaly aýdanynda jınalyp turǵan 2500 oram qamys órtenip ketti, dep habarlaıdy QazAqparat tilshisi.
Oqıǵa Qazaly aýdanynyń ortalyǵy - Áıteke bı kentinde boldy. Jergilikti seriktestiktiń qamys óńdeıtin tsehy aýmaǵynda órt shyqty. Aldymen 2000 rýlon qamys órtense, ol keıinnen 500 oram qamys jınalǵan ǵımaratty sharpydy.
«Tilsiz jaýdy aýyzdyqtaýǵa tótenshe jaǵdaılar departamentine qarasty 3 tehnıka men 30 qyzmetker tartyldy. Sondaı-aq, ózge qyzmet salalarynyń mamandary da órtti sóndirýge kúsh saldy. Oqys oqıǵadan qaza bolǵandar men zardap shekkender joq. Órttiń shyǵý sebebi anyqtalýda», - dep málim etti oblystyq tótenshe jaǵdaılar departamentinen.
Eske salsaq, budan buryn Qyzylorda oblysynda qonýǵa bet alǵan ushaq otqa oranǵan edi.