Qyzylordada 230 km jyldamdyqpen kólik aıdaǵan júrgizýshi jazaǵa tartyldy

QYZYLORDA. QazAqparat - Qyzylordada saǵatyna 230 shaqyrym jyldamdyqpen kólik basqarǵan júrgizýshi jazaǵa tartyldy, dep habarlaıdy QazAqparat tilshisi.

Bul oqıǵa 10 sáýir kúni tirkelgen. Ol boıynsha áleýmettik jelide avtokóliktiń jyldamdyǵyn asyrý deregi boıynsha beınejazba jarııalanǵan.

Oqıǵaǵa baılanysty oblystyq polıtsııa departamenti túsinikteme berdi.

«Oblys ortalyǵyndaǵy N.Nazarbaev dańǵylynda Kirister departamenti tusynda ornalasqan «Arkan» statsıonarly jyldamdyq ólshegish qurylǵysyna saǵat jergilikti ýaqytpen 06:05-te «Mercedes benz» úlgisindegi avtokóligimen saǵatyna 230 shaqyrym jyldamdyq asyrý deregi anyqtaldy. Bul boıynsha QR Ákimshilik quqyq buzýshylyq týraly kodeksiniń 592-babynyń 3-bóligine sáıkes uıǵarym shyǵaryldy. Oǵan 20 AEK (61260 teńge) kóleminde aıyppul salynyp, ol óndirilip alyndy», - dep jazylǵan habarlamada.

Eske salsaq, Qyzylordada bıyl 22 qylmysty jasyrý deregi anyqtaldy.