Qyzylordada 16 adamdy aldaǵan alaıaqtar ustaldy
Qyzylorda oblysynda 16 turǵyndy aldap soqqan alaıaqtar qolǵa tústi. Olar turǵyndardy Teńiz munaı kompanııasyna jumysqa ornalastyramyz dep ýáde bergen.
«Baıqońyr polıtsııasyna 16 turǵyn alaıaqtyń qurbany bolǵany týraly aryzdanǵan. Osy jyldyń naýryz-sáýir aılarynda eki azamat áleýmettik jeli arqyly arnaıy top ashqan. Onda aqshalaı syıaqy arqyly Atyraý oblysyndaǵy Teńiz munaı kompanııasyna jumysqa ornalastyratynyn aıtqan. Sol arqyly ár adamnan 150-200 myń teńge aralyǵynda banktegi esepshotyna aqsha aýdartyp alǵan. Jábirlenýshilerge kelgen shyǵyn úsh mln teńgege jýyqtaǵan», - dep málim etti Qyzylorda oblystyq polıtsııa departamentinen.
Vedomstvonyń málimetinshe, jedel-izdestirý sharalary barysynda alaıaqtyq jasady degen kúdikpen eki áıel ustaldy. Olardyń ekeýi de Qyzylorda oblysynda dúnıege kelgen. Atalǵan derek boıynsha QR Qylmystyq kodeksiniń 190-babynyń 3-bóligi 4-tarmaǵymen (Alaıaqtyq) sotqa deıingi tergep-tekserý áreketteri júrgizilýde.
Eske salsaq, budan buryn Qyzylordada qańtar oqıǵasynda polıtsııa ǵımaratyna qarýly shabýyl jasaǵandar ustalǵany jazyldy.