«Qyzylorda-Jezqazǵan» avtojolyn jóndeý jumystary qashan bastalady

ASTANA. QazAqparat - «Qyzylorda-Jezqazǵan» joly qurylysyna qarjy 2020 jyly bólinedi. Bul týraly Parlament Senatynyń jalpy otyrysynda «2018-2020 jyldarǵa arnalǵan respýblıkalyq bıýdjet týraly» zań jobasyn talqylaý barysynda QR Investıtsııalar jáne damý mınıstri Jeńis Qasymbek málim etti, dep habarlaıdy QazAqparat tilshisi.

Otyrys barysynda mınıstrden 427 shaqyrym bolatyn «Qyzylorda-Jezqazǵan» avtojolyn jóndeý jumystary qashan bastalatyndyǵy suraldy.

«Búgingi kúni Qazaqstan boıynsha 4 myń shaqyrym respýblıkalyq mańyzdaǵy joldarda qurylys jumystaryn júrgizip jatyrmyz. Oǵan qomaqty qarjy bólindi. Onyń negizgileri arasynda «Nurly jol» baǵdarlamasyna engen úsh baǵyt bar. Al kelesi jobalardyń tizimine «Qyzylorda-Jezqazǵan» joly kiredi. Bul jobalarǵa bıýdjetti 2020 jyldan bólemiz dep kózdep otyrmyz. Qazir bıýdjette mundaı múmkindik joq», - dedi Jeńis Qasymbek.

Budan buryn habarlanǵandaı, osy jol ýchaskesin salý jumystaryna shamamen 3 jyl ketetini aıtylǵan edi.