Qyzylorda turǵyny esirtki jasyryp jatqan jerinen polıtsııaǵa ustaldy
Qyzylorda qalasy polıtsııa basqarmasynyń patrýldik polıtsııa batalon qyzmetkerleri saýda úıiniń aldynda asa iri kólemde sıntetıkalyq esirtki taratqan er adamdy qolǵa túsirdi. Odan pırrolıdınovalerofenon esirtki zaty tárkilendi.
«Kúdikti mobıldik qosymsha arqyly tapsyrys alyp, esirtkini qala aýmaǵyndaǵy belgili bir jerlerge jasyryp ketip otyrǵan. Polıtseıler ony «sıntetıkany» jasyryn jerge qaldyryp jatqan jerinen ustady. Aıǵaqzat retinde kúdiktiden sıntetıkalyq zaty bar 13 orama alyndy», - dep málim etti Qyzylorda oblystyq Polıtsııa departamentinen.
Vedomstvo málimetinshe, atalǵan derek boıynsha QR Qylmystyq kodeksiniń 297-baby 3-bóliginiń 3-tarmaǵymen sotqa deıingi tergep-tekserý amaldary bastaldy. Kúdikti ýaqytsha ustaý ızolıatoryna qamaýǵa alyndy.