Qyzylorda oblysynyń ekonomıkasyna bıyl 424 mlrd teńge ınvestıtsııa tartylady

ASTANA. QazAqparat – Byltyr Qyzylorda oblysyna 400 mlrd teńgeden astam ınvestıtsııa tartylyp, óńirler arasynda úzdik kórsetkishterdiń birine ıe boldy. Bul týraly oblys ákimi Nurlybek Nálibaev Ortalyq kommýnıkatsııalar qyzmetinde ótken brıfıngide aıtty, dep habarlaıdy QazAqparat tilshisi.

«El Prezıdenti men Úkimettiń Syr óńirin erekshe qoldaýynyń arqasynda tyń jobalar júzege asýda. Oblys 2023 jyldyń tórt aıynda áleýmettik-ekonomıkalyq damýdyń makrokórsetkishteri boıynsha oń dınamıkaǵa qol jetkizdi. Aýyl sharýashylyǵynyń jalpy ónimi 1,6 paıyzǵa, óńdeý ónerkásibiniń kólemi 1,9 paıyzǵa, paıdalanýǵa berilgen turǵyn úıler kólemi 2,4 paıyzǵa, saýda kólemi 2,5 paıyzǵa, ınvestıtsııalar tartý 42,1 paıyzǵa, qurylys jumystarynyń kólemi 44 paıyzǵa artty», - dedi ol.

Onyń aıtýynsha, Qyzylorda oblysynyń bıylǵy bıýdjeti 593 mlrd teńge bolǵa. Bul 2022 jylǵy bıýdjetpen salystyrǵanda 205 mlrd 700 mln teńgege joǵary.

«Bıýdjettiń 64 paıyzy nemese 378,6 mlrd teńgesi áleýmettik salaǵa baǵyttalady. Ónerkásip óndirisiniń 70%-ǵa jýyq úlesin alatyn taý-ken sektorynda munaı óndirý qordyń sarqylýy saldarynan 2013 jyldan beri 6,5 mln tonnaǵa azaıǵan. Máselen 2013 jyly 10,5 mln tonna munaı óndirilse, 2022 jyly onyń kólemi nebári 4 mln tonna boldy.

Qazir jańa ken oryndaryn ıgerý úshin «Shý-Sarysý» basseıninde geologııalyq-geofızıkalyq zertteý jumystary aıaqtalyp, Aral basseıniniń «Batys» jáne «Shyǵys» bóliginde jalǵasýda.

Óńirde shıkizatqa táýeldilikti azaıtý úshin ekonomıkany ártaraptandyrýǵa baǵyttalǵan jobalardy iske asyrý jalǵasyn tappaq. Atap aıtqanda, ındýstrııalandyrý aıasynda óńirde quny 607,7 mlrd teńge bolatyn 34 joba iske asyp jatyr. Bul jobalar 6,3 myń adamdy jumyspen qamtýǵa múmkindik beredi», - dedi aımaq basshysy.

Ákimniń málimeti boıynsha, jalpyulttyq biryńǵaı jobalar pýlyna óńirden quny 907 mlrd teńgeden asatyn 36 joba engizildi.

«Byltyr quny 5,1 mlrd teńge bolatyn 4 joba iske qosyldy. Bıyl Syr óńirinde quny 13,4 mlrd teńgeniń 9 jobasy júzege asyrylady. Bul óńirge ınvestıtsııa tartý qarqynyn arttyrýǵa múmkindik beredi.

Atap ótý kerek, byltyr Qyzylorda oblysy ınvestıtsııa tartý qarqyny boıynsha respýblıka kóleminde aldyńǵy qatardan kórindi. Óńir ekonomıkasyna 409,5 mlrd teńge ınvestıtsııa salynyp, oblys elimiz boıynsha 1-shi orynǵa shyqty. Bıyl 424 mlrd teńge kóleminde ınvestıtsııa tartý josparlanýda», - dedi Nurlybek Nálibaev.