Qyzylorda oblysynyń bir aýdanynda 12 mektepten 500 mln teńge jymqyrylǵan

ASTANA. QazAqparat – Qyzylorda oblysynyń bir aýdanyndaǵy 12 mektepten 500 mln teńge jymqyrylǵan. Bul jaıynda óńir ákimi Nurlybek Nálibaev ortalyq kommýnıkatsııalar qyzmetinde ótken brıfıngide málim etti, dep habarlaıdy QazAqparat tilshisi.

Brıfıng kezinde jýrnalıst memlekettik aýdıt qorytyndysy boıynsha Qyzylorda óńirinde bıýdjet aqshasyn tıimsiz ıgerý beleń alǵanyn aıtyp, jemqorlyqpen kúres qalaı júrip jatqanyn surady.

«Biz quqyq qorǵaý organdarynyń basshylarymen birge bilim salasyndaǵy kóp tekserý júrgizip jatyrmyz. Qazirgi tańda bir aýdannyń ózinde 12 mektepte 500 mln teńgeden astam qarjy jymqyrylǵany belgili boldy. Sol boıynsha qazir is qozǵaldy. Tergep-tekserý amaldary júrip jatyr. Sheshim qabyldanady», - dedi Nurlybek Nálibaev.

Onyń aıtýynsha, atalmysh máseleni ákimdiktiń ishki aýdıti de baqylap otyr.

«Revızııalyq komıssııa jáne bar. Osylar qazir jumys istep jatyr. Bilim salasynda, densaýlyq saqtaý salasynda, búkil salada osyndaı jumys júrgizemiz. Mysaly, qazir qoǵam belsendileriniń qatysýymen balabaqshalarda reıd jasalyp jatyr. Shynyn aıtý kerek, memleketten 100 balaǵa, 150 balaǵa tapsyrys alyp jatyr. Al baryp qarasaq, onda 100 balanyń ornyna 60-70 bala júredi. Osyny da anyqtap jatyrmyz. Mundaǵy maqsat – bıýdjettiń qarjysyn barynsha únemdeý, ysyrapshyldyqqa jol bermeý, qarajatty eń ózekti degen máselelerge baǵyttap, halyqtyń usynys-tilegin oryndaý», - dedi ákim.