Qyzylorda oblysynyń Aral aýdanynda mektep, balabaqsha jáne sport kesheni ashyldy
«Memleket úshin de, adam úshin de bala ómirinen qymbat baılyq joq. Sondyqtan da, ótken jyly mektep ǵımaratynyń qurylysy bastalyp, óz ýaqytyna saı jańa oqý jylynda paıdalanylýǵa berildi. Osy kezge deıin №71 mektep-ınternatynyń eski oqý ǵımaraty apatty jaǵdaıda dep tanylyp keldi. Endi ol qaýip joıyldy. Eldiń ardagerleri men ustazdar qaýymynyń suranysy tolyq óteldi. Bilim jolynda eńbekqorlyqtyń ólsheýsiz úlgisin kórseter ustazdar qaýymynyń urpaq tárbıeleý isindegi eńbekterine sáttilik tileımin!», - dedi N. Nálibaev jańa mekteptiń ashylý saltanatynda.
Jalpy, óńirdegi qırap turǵan 4 mekteptiń 3-eýiniń bıyl sheshimi tabylyp, onyń ekeýi qyrkúıek aıynda paıdalanýǵa berilmek. Máselen, Araldaǵy Toqabaı eldi mekeninde paıdalanýǵa jaramsyz dep tanylǵan №248 orta mektep jeke ınvestor esebinen qaıta salynyp jatyr. Aıta ketý kerek, Toqabaı aýylynda 11-synyp bitirgen túlekterdiń barlyǵy bıyl memlekettik grant ıegeri atandy.
Munan bólek, aldaǵy 3 jylda Aral aýdanynyń ózinde 8 mekteptiń qurylysy júrgizilip, jańa nysandar boı kótermek. Onyń ishinde, asarlatý ádisimen salynǵan Sapaq aýyldyq okrýgindegi №69 orta mektep pen Mergensaı eldi mekenindegi №58 orta mektebi kelesi jyly salynatyn mektepter tiziminde tur. Jalpy, Syr elinde aldaǵy 3 jylda 32 mektep salynbaq.
Oblys ákimi Jaqsyqylysh kentindegi «Asylym» jeke balabaqshasynyń ashylý rásimine qatysty. Jańadan boı kótergen nysan 140 búldirshinge laıyqtalǵan. Oblys ákimi aýyl turǵyndaryn jańa nysannyń ashylýymen quttyqtap, bilim salasyna ınvestıtsııa quıǵan kásipkerge alǵys bildirdi.
Búginde Aral – 3 pen 6 jas aralyǵyndaǵy búldirshinderdi balabaqshamen 100 paıyz qamtyǵan aýdannyń biri. 2025 jylǵa qaraı aýdanda 16 jeke balabaqsha jáne 4 mektep janynan shaǵyn ortalyq ashylmaq.
Sapar barysynda Nurlybek Nálibaev Aralqum aýyldyq okrýgi Shómish eldi mekenindegi «Laton-Market» JShS-niń demeýshiligimen salynǵan ámbebap kishi sport alańyn kórip, aýyl turǵyndarymen kezdesti.
«Balalarǵa tartý retinde óńirde parkter, skverler salynyp jatyr. Jaqynda ǵana Jańaqorǵanda metsenat 750 mln teńgege park salý isine belsene kiristi. Al, demeýshilerdiń qoldaýymen qalada 50, aýdandarda 30 balalar alańy boı kóteredi. Taǵy bir janashyr azamat 1,5 mlrd teńgege «Anaǵa taǵzym» alańyn salyp berýge nıet bildirdi. Mine, osyndaı shaǵyn alańdardy balalardyń ıgiligi úshin tabystaý úlken ıgilikti is dep sanaımyz», - dedi N. Nálibaev.
Sport alańynda 12 jas bir mezette oınaı alady. Aýmaǵy 800 sharshy metr bolatyn temir tormen qorshalǵan alańda 6 jaryqsham qoıylyp, gazon tóselgen. Sport alańyna kelgen jastar oblys ákimimen tildesti.
Munan keıin óńir basshysy Aral Quarts kvarts qumyn baıytý taý-ken kombınatyna bardy. Jylyna 120 myń tonna kvarts qumyn óndiretin kásiporyn alǵashqy kezeńde 40 mamandy jumyspen qamtysa, ІІ kezeńde 172 myń tonna qurǵaq qurylys untaǵyn shyǵarýǵa den qoıyp, 88 maman eńbekke tartyldy. Óndiris orny ishki naryqty 80 paıyz ónimmen qamtıdy. Nurlybek Nálibaev shyny zaýytyna qajetti ónimdi osy óndiris qamtamasyz etýi kerek ekendigin alǵa tartyp, kombınat jumysyn baǵdarlady. Kásiporyn aıyna 5500-6000 tonna ónim óndirýge qaýqarly. Qazirgi tańda 3,5 myń tonna ónim daıyndalǵan.
Sondaı-aq, óńir basshysy Amanótkel aýyldyq okrýgine baryp, «Aýyl – el besigi» baǵdarlamasy aıasynda salynǵan dene shynyqtyrý jáne saýyqtyrý kesheniniń ashylý rásimine qatysty.
«Sport – el mereıin asyryp, abyroıyn arttyratyn aýqymdy sala. Óńirde «Balalar jyly» aıasynda demeýshilerdiń qoldaýymen 80 oıyn alańy salynyp jatyr. Aral aýdanynda sonyń 5-eýi jyl aıaǵyna deıin aýdan turǵyndarynyń ıgiligine qyzmet etetin bolady. Bul keshende baıraqty básekelerde, Olımp shyńynda Kók Týymyzdy jelbireter dańqty sportshylar jattyǵyp shyǵaryna senimdimin! Jańa sport ǵımaraty qutty bolsyn», - dedi aımaq basshysy.
Nurlybek Nálibaev sportpen shuǵyldanýǵa nıetti jastarmen júzdesip, pikirlesti. Munda bir mezette 40 balanyń sportpen shuǵyldanýǵa múmkindigi bar. Olar basketbol, voleıbol, shaǵyn fýtbol oınaı alady. Aıta ketsek, mundaı deneshynyqtyrý-saýyqtyrý kesheni Jaqsyqylysh kenti men Qamystybas eldi mekeninde de salynyp jatyr.
Nurlybek Nálibaev Araldyń Qamystybas aýyldyq okrýginde qutqarý bólimshesiniń modýldik stantsııasynyń jumysyn kórdi. 9 bólmeden turatyn bólimshede medıtsınalyq pýnkt, kezekshi dıspecherlik jáne kompressorlyq bólme qamtylǵan. Aýmaǵy 250 sharshy metrdi bolatyn ortalyq tótenshe jaǵdaı kezinde turǵyndarǵa operatıvti kómekti jyldam úılestirýge múmkindik beredi.
Aral aýdanyndaǵy sapary sońynda oblys ákimi Nurlybek Nálibaev aýdan ákimine Prezıdent Joldaýynan týyndaǵan mindetterdi ýaqtyly ári sapaly oryndaýdy tapsyrdy.