Qyzylorda oblysynyń ákimi soltústik aýdandarda boldy
Búgin oblys ákimi Qýanyshbek Ysqaqov Qazaly aýdanynyń Janqoja batyr, Bekarystan bı jáne Aral aýdanyna qarasty 12 eldi mekeninde bolyp, turǵyndarmen kezdesýler ótkizdi.
Qazaly aýdanyna qarasty Bekarystan bı aýylynyń turǵyndary aımaq basshysyna aýyz sý máselesi men sport keshenin salý týraly ótinishterin jetkizdi. Oblys ákimi aýyz sý máselesi bıyl óz sheshimin tabatynyn jáne sport keshenin jergilikti kásipkerlermen birlesip memlekettik-jekeshelik áriptestik negizinde salý joly qarastyrylatynyn aıtty.
Odan keıin oblys ákimi Qýanyshbek Ysqaqov Aral aýdanynyń eń shalǵaı ornalasqan Qaratereń, Qarashalań, Bógen sııaqty aýyldarynda boldy. Júzdesý barysynda jergilikti turǵyndar jol, uıaly baılanys jelisin ornatý, ǵımaraty eskirgen balabaqshalar, aýyldyq klýb úılerin jańartý jáne keıbir eldi mekenderde toǵandaǵy sý problemasyn sheshý sııaqty máselesin kóterdi.
Sondaı-aq, júzdesý barysynda Aral aýdany Amanótkel aýyly tusynda ornalasqan qalqymaly kópirdi jańartý men Qarashalań eldi mekeniniń jol máselesi kóterildi. Oblys ákimi qalqymaly kópirge qatysty qarjy qaralyp, tıisti jumystar atqarylatynyn aıtty. Al Qarashalańdaǵy joldy jóndeýge qajet qarajat qaralǵan. Jóndeý jumystary bıyl júrgiziledi.