Qyzylorda oblysynyń ákimi óńirdegi eldi mekenderdi gazdandyrý jospary týraly aıtty
Atap aıtqanda, búgin oblys ákimi Gúlshara Ábdiqalyqova jumys saparymen Syrdarııa aýdanyna baryp, birqatar áleýmettik mańyzy bar nysandy aralady. Aldymen aımaq basshysy Jetikól aýyldyq okrýgine at basyn buryp, «Jumyspen qamtý jol kartasy» aıasynda júzege asqan turǵyn úılerdi sýmen jabdyqtaý júıesin qaıta jańǵyrtý jumystarymen tanysty.
«Korporatsııa Álem-Qurylys» JShS-i qolǵa alǵan jobanyń quny 144,5 mln. teńgeni quraıdy. Qaıta jańǵyrtý jáne keńeıtý jumystary arqyly 18 jumys orny ashylǵan. Aýyz sý qubyry munarasynda aýdan ákimi Talǵat Dúısebaev Jetikól eldi mekeniniń turǵyndary úshin mańyzdy turǵyn úılerdi sýmen jabdyqtaý jumystarynyń oryndalý barysyn baıandady.
Munan keıin, oblys ákimi aýyldyq okrýgtegi №174 orta mekteptiń jáne «Balaýsa» shaǵyn ortalyǵynyń jumysymen tanysty. 320 oryndyq mektepte 158 oqýshy bilim alady. Oqý ordasy janynan 25 oryndyq «Balaýsa» shaǵyn ortalyǵy ashylǵan. Búgingi kúni mektepte 60 qyzmetker, shaǵyn ortalyqta 11 maman jumys atqarady. Gúlshara Ábdiqalyqova shaǵyn ortalyqtyń jumysyn baǵamdap, balalardyń saqtyǵy máselesine jete mán berýdi tapsyrdy.
Jumys sapary barysynda oblys ákimi Tereńózek kentine baryp, kenttegi gaz qubyrlary jáne kvartalishilik gaz qubyrlarynyń qurylysymen tanysyp, aýyl turǵyndaryna kógildir otyn berý rásimine qatysty. Jalpy quny 2,4 mlrd teńgeni quraıtyn Tereńózek kentindegi kvartalishilik gaz qubyrlary jelisiniń qurylysy 2019-2020 jyldary júzege asty. Oblys ákimi 11 myńnan astam turǵyndy gazben qamtamasyz etýge múmkindik bergen aıtýly kúnde syrdarııalyq turǵyndarǵa tabys tilep, qýanyshtaryna ortaqtasty.
«Kent ortalyǵyna qosylyp jatqan alaý otynymyz, kógildir gaz ár otbasyna óziniń jylylyǵymen kele bersin. Álemdi sharpyǵan daǵdarysqa qaramastan, áleýmettik mańyzy bar qurylys, gazdandyrý sekildi kúrdeli bastamalardy keıinge qaldyrmaı, iske asyryp kelemiz.
Ótken jyly Aral aýdanyndaǵy Jaqsyqylysh, Qazaly aýdanyndaǵy Muratbaev jáne Shıeli aýdanyndaǵy Baısyn eldi mekenderi gazǵa qosyldy. Nátıjesinde, qazirgi tańda oblys turǵyndarynyń 65 paıyzy tabıǵı gazǵa qol jetkizip otyr. Aýdan ortalyqtaryn tolyq gazdandyrǵannan keıin, oblystaǵy eldi mekenderge kógildir otyn jetkizý josparymyzda bar. Bul – bir aýdannyń ǵana emes, oblystyń qýanyshy. Ár otbasynan jylý ketpesin, Otanymyzdyń qýaty arta bersin»,-dedi oblys ákimi.
Eldi mekenderdi gazǵa qosý kezeń-kezeńimen iske asady. Syrdarııa aýdanynda joba boıynsha birinshi kezekte Tereńózek kentine jaqyn ornalasqan Qaljan ahýn, Sáken Seıfýllın, Asqar Toqmaǵambetov jáne Syrdarııa ózeniniń ońtústigine gaz qubyryn ótkizip, Shaǵan eldi mekeni kógildir otynǵa qosylady.
Aıta keteıik, Oblysta Aral, Qazaly, Shıeli, Jańaqorǵan aýdandarynyń ortalyqtary men Baıqońyr qalasy kógildir otynǵa qosylǵan. Qalǵan 3 aýdan ortalyǵy - Josaly, Jalaǵash, Tereńózek, sondaı-aq, Sekseýil, Tóretam, Aqaı eldi mekenderin gazdandyrý kezeń-kezeńimen júzege asyp jatyr.
Kentti kógildir otynǵa qosý rásiminde aýdandyq ardagerler keńesiniń tóraǵasy Qaırolla Ábenuly el ıgiligine baǵyttalǵan, áleýmet úshin ózekti máseleniń sheshimin tapqanyn tilge tıek etip, aýyl turǵyndaryn quttyqtady.
Munan keıin aımaq basshysy Gúlshara Ábdiqalyqova gaz alaýy jaǵylǵan Ǵanı Muratbaev kóshesindegi №94 úıdiń turǵyny, eńbek ardageri Qonysbek Ábsadyqovtyń úıine baryp, otbasynyń qýanyshymen bólisti.
Syrdarııa aýdanyndaǵy jumys saparyn qorytyndylaǵan oblys ákimi aýdan ákimi Talǵat Dúısebaevqa birqatar mańyzdy tapsyrmalar júktedi. Koronavırýstyq ınfektsııadan saqtaný baǵytyndaǵy saqtyq sharalaryn saqtaý jáne karantın talaptaryn eskerýdi tapsyrdy. Sondaı-aq, áleýmettik-ekonomıkalyq tabys kózin quraıtyn mańyzdy jobalardy iske asyrýdy qaperge saldy.