Qyzylorda oblysyndaǵy Turan eldi mekeni «kógildir otynǵa» qosyldy
El Táýelsizdiginiń 30 jyldyq mereıtoıy aıasynda oblys ákimi Gúlshara Ábdiqalyqova búgin Shıeli aýdanyndaǵy «kógildir otynǵa» qosylǵan Turan aýyly turǵyndary qýanyshyna ortaqtasty.
«Aýyl - el besigi» baǵdarlamasy aıasynda Shegen Qodamanov eldi mekeninde gaz qubyry jáne kvartalishilik gaz taratý jelisi júrgizildi. Ol «Beıneý-Bozoı-Shymkent» magıstraldy gaz qubyryna qosylǵan.
«Barshańyzdy Tuńǵysh Prezıdent kúni men Táýelsizdigimizdiń 30 jyldyǵy merekesimen tustas kelgen serpindi jobanyń biri - Turan aýyldyq okrýginiń gazǵa qosylýymen quttyqtaımyn.
Jyl saıyn halyqtyń suranysyn qanaǵattandyrý maqsatynda turǵyndardyń jaıly turmys keshýine eń qajetti aýyz sý, gaz tartý, jol salý sekildi máseleler kezeń-kezeńimen sheshimin tabýda.
Búgingi ıgilikti is boıynsha bas merdiger kompanııa «Stroı Gaz Kompanı» mekemesi qurylys jumystaryn júrgizdi. Osyǵan oraı olarǵa barsha aýyl turǵyndar atynan jáne alǵys aıtamyn», - dedi oblys ákimi.
Qazirgi tańda aýdanda Shıeli kenti men Baıterek, Jańaturmys, Bıdaıkól, Kerdeli aýyldyq okrýgteri gazǵa qosylǵan. Jyl basynan beri oblysta Josaly, Jalaǵash, Tereńózek kentteri sekildi aýdan ortalyqtaryna, Shıeli aýdanyndaǵy Bekejanov jáne Qodamanov aýyldaryna «kógildir otyn» berildi. Endi jyl sońyna deıin Qazaly qalasyn gazǵa qosylmaq. Qazirge deıin oblystaǵy barlyq aýdan ortalyǵy men Qyzylorda qalasyna gaz tolyq tartyldy. Nátıjesinde oblys turǵyndarynyń 65 paıyzy kógildir otyn paıdalaný múmkindigine ıe bolǵan.
Óńir basshysy Shıeli aýdanyna jumys sapary aıasynda Aqmaıa sharýa qojalyǵyna bardy. Aýylda monsha kúrdeli jóndeýden ótkizilip, sharýa qojalyǵy demeýshiligimen turǵyn úı salynǵan. Sharýa qojalyǵynyń basshysy Dáýlet Jumbekov qojalyqta jumys isteıtin kópbalaly 2 otbasyǵa baspana salý úshin osyndaı ıgilikti isti qolǵa alǵan.
Ári qaraı oblys ákimi Kerdeli aýyldyq okrýginde memlekettik-jekeshelik áriptestik aıasynda salynǵan sport saýyqtyrý keshenin ashty.
Aımaq basshysy ıgi bastamany qoldap, nysannyń boı kóterýine yqpal jasaǵan kásipker, Shıeli aýdanynyń qurmetti azamaty Baǵlan Áshirbekovke rızashylyǵyn bildirdi.
«Sońǵy 5 jylda memlekettik-jekemenshik áriptestik aıasynda aýdanda Aqmaıa, Alǵabas, Bestam, Turan aýyldyq okrýgterinde sport kesheni paıdalanýǵa berildi. Endi olardyń qataryna taǵy bireýi qoysylyp otyr. Sport kesheninde shyńdalǵan órender keleshekte tolaıym tabystarǵa keneledi degen úmittemiz», - dedi Gúlshara Ábdiqalyqova.
Sport kesheninde kúres, taekvando, basketbol jáne aýyr atletıkadan úıirmeler ashylyp, 11 azamat turaqty jumyspen qamtyldy.
Munan soń, óńir basshysy Shıeli kentindegi aýdandyq jastar úıi men I.Ábdikárimov kóshesi boıyna salynyp jatqan alleıany kórdi. Aýdandyq «Jastar resýrstyq» ortalyǵynyń dırektory Erjan Ábdeshov shıelilik jastardyń bastamasymen iske asyp jatqan jobalarǵa toqtaldy. Ortalyqta kitaphana, konferents zal, kovorkıng, ónerli jastarǵa arnalǵan arnaıy oryn bar. Sonymen qatar, patrıottyq tárbıe berý jáne jastar arasynda ulttyq qundylyqtardy nasıhattaý baǵytynda birqatar jumystar júrgizilýde.
Jumys saparyn qorytyndylaǵan oblys ákimi eldi mekenderdegi ınfraqurylymdy damytý jumystarynyń odan ári jalǵasatynyn jáne jobalardy ýaqytynda tapsyrý kerektigin qaperge saldy.
Eske salsaq, Táýelsizdiktiń 30 jyldyǵy qarsańynda Jańaqorǵanda birqatar áleýmettik nysandar ashyldy.