Qyzylorda oblysyndaǵy 15 myń ga kúrish alqabyna basqa daqyldar egiledi

NUR-SULTAN. QazAqparat – Qyzylorda óńirindegi kúrish alqaptaryn kúrt azaıtsa, topyraq tuzdanýǵa ushyraıdy. Osyny eskergen jergilikti ákimdik qysqartý jumystaryn aýyspaly eginshilik tásilimen birtindep iske asyrmaqshy.Bul týraly Ekologııa, geologııa jáne tabıǵı resýrstar mınıstriniń orynbasary Serik Qojanııazov QazAqparat tilshisiniń saýalyna joldaǵan jaýabynda aıtty.

«Qyzylorda oblysynyń áleýmettik-ekonomıkalyq jáne ekologııalyq ahýaly Syrdarııa ózeni basseıniniń kepildi sýmen qamtamasyz etilýine tikeleı baılanysty. Oblys transshekaralyq Syrdarııa ózeniniń eń tómengi aǵysynda ornalasqandyqtan joǵarydan keletin sýdyń kólemine táýeldi. Jyl saıynǵy vegetatsııa kezinde oryn alyp otyrǵan sý tapshylyǵyn azaıtý maqsatynda aldaǵy jyldary egin sharýashylyǵyn ártaraptandyrý jumystaryna basymdyq beriletin bolady», - delingen jaýapta.

Vıtse-mınıstr keltirgen derekterge súıensek, óńirdegi egis alqaptarynda topyraqtyń 35% – qatty, 65% – ortasha tuzdanǵan. ıAǵnı, munda sýdyń basym bóligi egin sýarýǵa emes, topyraq tuzdylyǵyn shaıýǵa ketedi.

«Aral óńiriniń erekshe topyraq-klımattyq jaǵdaılarynda kúrishtiń melıoratıvtik-ekologııalyq jáne ekonomıkalyq mańyzy zor. Eger aımaqta kúrish kólemi kúrt tómendetilse, ınjenerlik tegistelgen jerlerdiń ekinshi tuzdanýyna ákep soǵatyny belgili. Bul ǵylymı dáleldengen. Sondyqtan, aýyspaly egis tártibin qatań saqtap, Qyzylorda oblysy ákimdigi kúrish daqyly kólemin kezeń-kezeńimen 75-80 myń gektarǵa turaqtandyratyn bolady. ıAǵnı, 2021 jyly kúrishtiń egis kólemin 84,4 myń gektarǵa deıin (5,1 myń gektarǵa azaıtylady) tómendetý boljamdalyp otyr», - deıdi Serik Qojanııazov.

Al, onyń ornyna sýdy únemdeýge múmkindik beretin basqa daqyldar kólemin 6 myń gektarǵa ulǵaıtý josparlanyp otyr. Atap aıtsaq, mal azyǵy daqyldarynyń kólemin 4,6 myń ga, maıly daqyldardy 900 ga, kartop, kókónis, baqshalyq daqyldardyń kólemi 476 ga keńeıedi.

«Nátıjesinde kelesi jyly aýyl sharýashylyǵy daqyldarynyń egis kólemin 3,1 myń gektarǵa arttyra otyryp, 187,3 myń ga ornalastyrý mejelenip otyr», - deıdi vedomstvo ókilderi.

Buǵan deıin habarlaǵanymyzdaı, jalpy elimizdiń 3 óńiri boıynsha aldaǵy 10 jylda 29 myń gektar kúrish alqabyn qysqartý josparlanǵan.

Salaǵa jaýapty mınıstrlik deregi boıynsha, qysqarǵan kúrish alqaptarynyń ornyna baqsha daqyldary men mal azyǵyna qajet kópjyldyq shópter egilýi múmkin.