Qyzylorda oblysynda jazasyn ótep jatqan 27 adam mektepke bardy

NUR-SULTAN. QazAqparat – Jańa oqý jylynda Qyzylorda oblysyndaǵy túzeý mekemelerinde jazasyn ótep jatqan 27 adam bilim alý úshin keshki mektepke qabyldandy, dep habarlaıdy QazAqparat oblystyq qylmystyq-atqarý júıesi departamentiniń baspasóz qyzmetine silteme jasap.

Qyzylorda oblysy boıynsha QAJ departamentiniń №37 (ZK-169/4) mekemesinde jazasyn ótep júrgen orta bilimi joq 14 sottalǵan, sondaı-aq №60 (ZK-169/5) mekemesindegi 13 sottalǵan bekitilgen sabaq kestesine sáıkes arnaıy kabınette bilim alady. Sottalǵandar aıaqtalmaı qalǵan orta bilimin jalǵastyrady. Biri 8-synypqa qabyldansa, qalǵany 9, 10, 11-synypta oqıdy. Olarǵa Qyzylorda qalasynyń jalpy bilim beretin keshki mektebi men Shıeli aýdandyq jalpy orta bilim beretin keshki mektebiniń muǵalimderi sabaq beredi.

Aıta ketsek, QR ІІM-niń 2014 jylǵy 18 tamyzdaǵy №516 buıryǵynda sottalǵandarǵa negizgi orta, bastaýysh, jalpy orta bilim, tehnıkalyq jáne kásibı bilim alý týraly aıtylǵan. Onyń ishinde 30 jasqa deıingi sottalǵandar orta bilim alýǵa mindetti dep kórsetilgen.