Qyzylorda oblysynda jalǵan nesıe qujatymen eldi aldaǵan áıel sottaldy
Azamatsha Shıeli aýdanynyń jumyssyz júrgen 20 azamatynyń jeke kýáligi kóshirmesin aldaý jolymen alǵan. Olardy quryltaıshy retinde biriktirip, asa iri kólemde nesıe qarajatyn ıemdený maqsatynda «Arna-1» JShS-in qurǵan. Oǵan ózin basshy retinde taǵaıyndaǵan.
«Sodan keıin múıizdi iri qara ósirýmen aınalysatyn sharýashylyq qurý jáne damytý maqsatynda 60 mln teńge nesıe alýǵa bıznes jospar ázirlegen. Osy maqsatta 60 mln teńgege qol jetkizgen. Eki quryltaıshyǵa 3 mln teńge aýdaryp, quryltaıshylar atynan jalǵan nesıe qujatyn ázirleý arqyly qalǵan 54 mln teńgeni jeke bas paıdasyna jaratqan. Tergeý barysynda júrgizilgen qoltańbalyq saraptamalar arqyly quryltaıshylardyń barlyq qujattaǵy qoltańbasyn kúdiktiniń ózi oryndaǵany anyqtaldy. Qazirge deıin nesıe qaryzyn ótelmegen», - dedi Qyzylorda oblysy boıynsha Ekonomıkalyq tergep-tekserý departamentinen.
Vedomstvo málimetinshe, Shıeli aýdandyq sotynyń úkimimen azamatsha bótenniń múlkin aldaý jáne senimdi teris paıdalaný jolymen asa iri mólsherde jymqyrǵany úshin, 5 jylǵa shartty túrde bas bostandyǵynan aıyryldy.
«Barlyq merzimge probatsııalyq baqylaý belgilendi. Oǵan qosa 17 azamattyń quqyǵy qalpyna keltirilgen. Olardyń syrtynan rásimdelgen nesıe boıynsha mindetteme alynyp tastaldy. Múlikteri qoıylǵan tyıymnan bosatyldy», - dep tolyqtyrdy departamentten.
Eske salsaq, budan buryn Qyzylordada zańsyz oıyn bıznesin uıymdastyrǵan almatylyq áıel jazaǵa tartyldy.