Qyzylorda oblysynda zamanaýı úlgidegi Oqýshylar saraıy salynady
Oblys ákimdiginiń qoldaýymen aımaqta jańa jobalar júzege asyrylyp keledi. Sonyń ishinde bilim berý nysandarynyń qurylysy erekshe qarqyn aldy.
Qalanyń sol jaǵalaýynan 300 orynǵa arnalǵan jataqhanasy bar, daryndy balalarǵa arnalǵan 400 oryndyq fızıka-matematıka mektep-ınternatyn salý josparlanyp otyr. Qurylys mamyr aıynda bastalmaq.
Osy kezge deıin Qyzylorda qalasynda bir ǵana Oqýshylar úıi bar edi. Endi sol jaǵalaýda 350 orynǵa arnalǵan zamanaýı úlgidegi ekinshi Oqýshylar saraıynyń qurylysy bastalmaq.
Bıyl daryndy balalardy qoldaý maqsatynda Qyzylorda qalasy men Qarmaqshy aýdanynda 150 orynǵa arnalǵan mamandandyrylǵan mektep-lıtseı ashyldy. Oǵan qosa, Jezqazǵan trassasy boıynda 600, Jańaqorǵan aýdany «Maıbeket» móltek aýdanynda 300, Shıeli aýdany Baısyn aýylynda 250, Qazaly aýdany Áıteke bı kentinde 250 oryndyq mektepter el ıgiligine beriledi. Al, Aral aýdany Toqabaı eldi mekenindegi №248 apatty mektep jeke ınvestor esebinen jańaryp, bıyl paıdalanýǵa berilmek.
«Jaıly mektep» ulttyq jobasy aıasynda oblysta aldaǵy 3 jylda 15 100 orynǵa arnalǵan quny 100 mlrd teńgeden asatyn 21 mektep salynady. Bıyl 10 mekteptiń qurylysy bastalady. Bul 2025 jyly óńirdegi úsh aýysymdy jáne apatty mektepter máselesiniń tolyǵymen sheshim tabýyna, balalardyń sapaly bilim alýyna berik negiz qalaıdy.
Munan bólek, Qyzylorda qalasyndaǵy úsh aýysymǵa kóshýi múmkin mektepterdiń máselesi de bıyl sheshimin tabady. Qazir Abaı atyndaǵy mektep janynan 550 oryndyq, №101 mektep-lıtseı janynan 375, №264 mektep-lıtseı janynan 550, №3 mektep-lıtseı janynan 375 oryndyq qosymsha oqý ǵımarattary salynyp jatyr.
Oblystaǵy bilim berý uıymdarynyń barlyǵy beınebaqylaýmen qamtylǵan. Qurylǵylardyń sanyn tolyqtyrý, sondaı-aq jóndeýdi qajet etetin beınebaqylaý júıesin iske qosý oılastyrylyp otyr. Bul baǵytta ótken jyly 35 mektepke 250 mln teńge bólinse, osy jyly 35 mektep, 28 balabaqshaǵa beınebaqylaý ornatýǵa 453,6 mln teńge qaraldy. Oǵan qosa, jergilikti bıýdjetten 170 mektepke dabyl túımesin ornatýǵa 97,1 mln teńge bólindi. Osylaısha, bilim oshaqtarynda balalardyń qaýipsizdigi 100 paıyz qamtamasyz etilgen.
Qazirgi kún tártibindegi máseleniń biri – bý qazandyqtary japsarlas nemese negizgi ǵımarat ishinde ornalasqan 11 bilim nysanynyń qurylysy. 4 mekteptiń smetalyq qujattary ázirlenip, onyń 2-eýniń qurylysy qoldaý tapty. Qalǵan 7 bilim berý nysany boıynsha smetalyq qujattar ázirlenip jatyr. Sonymen qatar, byltyr apatty dep tanylǵan 6 mekteptiń 3-niń máselesi sheshimin tapty.
Jylma-jyl ustazdardyń biliktiligin kóterý máselesi júıeli túrde júzege asyrylyp keledi. Mysaly, ótken jyly 7 610 pedagog biliktiligin arttyrý kýrsynan ótse, bıyl taǵy da 8 myńǵa jýyq ustaz biliktiligin arttyrady. Aıta keteıik, biliktilik arttyrýdyń taǵy bir krıterııi – attestatsııa, osyǵan sáıkes 2022 jyly 700 pedagog attestatsııadan ótken.
Byltyr «Úzdik pedagog-2022» respýblıkalyq baıqaýyna qatysqan 4 ustaz joǵary marapat ıelense, oblystyq baıqaýda jeńimpaz atanǵan 6 ustazǵa 918 myń teńgeniń sertıfıkaty tabystaldy.