Qyzylorda oblysynda tumaý juqtyrǵandar sany artty

QYZYLORDA. QazAqparat - Qyzylorda oblysynda jyl basynan beri tumaý juqtyrǵandar sany artty jáne ótken jylǵy uqsas kezeńmen salystyrǵanda 39 paıyzǵa joǵarylady, dep habarlaıdy QazAqparat tilshisi.

Óńirde 2021-2022 jyldardaǵy epıdmaýsymda jedel respıratorlyq vırýsty ınfektsııasyna (JRVI) shaldyǵýdyń 19745 deregi tirkeldi. Olardyń 64,7 paıyzy 14 jasqa deıingi balalardyń úlesinde. Onyń ishinde 24,1 paıyzy – 1 jasqa deıingi náresteler. Esepte turǵan júkti áıelder arasyndaǵy JRVI-ǵa shaldyǵý kórsetkishi 25 paıyzdy quraıdy.

Júrgizilgen epıdemıologııalyq monıtorıngige sáıkes óńirde epıdahýaldyń kúrdelenýi baıqalǵan joq.

«Ótken jyldyń uqsas merzimimen salystyrǵanda aýrýshańdyq deńgeıi 39 paıyzǵa joǵary», - dep málim etti oblystyq Sanıtarııalyq-epıdemıologııalyq baqylaý departamentinen.

Tumaý aýrýynyń aldyn alý maqsatynda 2021-2022 jyldardaǵy epıdmaýsymǵa 80186 doza vaktsına satyp alynǵan bolatyn. Óńir turǵyndary arasynda tumaýǵa qarsy vaktsınalanǵan kontıngent 95,6 paıyzǵa jýyq.